Read njo TENÜNGSANG KEN 72 Bible Online

TENÜNGSANG KEN 72 - njo bible

TENÜNGSANG KEN 72

¹Oh Tsüngrem, ne obendang chuba nem agüjang; aser ne temeshiba chuba chir nem agüjang.

²Anungji pai ne nübur temeshiba agi o bendangtsü, aser ne nübur sensaker temeshiba agi o bendangtsü.

³Tenemi nüburtem dangi yimji-yimjung, aser ungsemtemi temeshiba bena arutsü.

⁴Pai nübur rongnung sensakba pur kümdakjang, meshimejunger kümzükang aser rishikangshir ajasajang.

⁵Putu ajak songtema anü aser ita, merema maküm tashi pa lidakjang.

⁶Rem lanu madak tzünglu ajalok ama, tzünglupui ali tayi kümdaktsüba ama pa aludakjang.

⁷Pa anogotem nung temeshiba rendakjang, aser ita sangwa marem tashi yimjung lidakjang.

⁸ Tzüyim nungi tzüyim tashi, Ayong nungi ali tatem tashi pai yimsü asütsü.

⁹Lisem lima alirtemi pa tsüngdang apudaktsü; aser tsükchirtemi auyi menaktsü.

¹⁰Tarshis aser asetkong chubatemi alimelen agütsütsü, Sheba aser Seba[3] chubatemi sempet agütsütsü.

¹¹Chuba ajaki pa dang apudaktsü, kin ajaki pa tenzüktsü,

¹²Kechiaser meshimejungeri ayimtendang, aser teyarir malir sensaker pai kümzüktsü.

¹³Tashi maiter aser meshimejunger dang pai ajunger, aser meshimejunger tasütsü nungi kümzüker.

¹⁴Tekangshi aser azütokshir nungi pai parnok kümzüktsü; kechiaser parnok züji pa madang senti lir.

¹⁵Pa taküm talangka lidakjang, pa nem Sheba hon agüjang. Nisungtemi pa dang maneni sarasademdakjang, aser anogo tepiyong pa moajang.

¹⁶Linük nung tsük jenti adokdakjang, tenem nungi ayipshidakjang iba süngjangji Lebanon ama süngdakjang, moapu nung ai agi sünga aliba ama, yimtitem nung nisungtem sünga rendakjang.

¹⁷Pa tenüng tatem makai lidakjang, anü sangwa marem tashi pa nüngsang maneni alitsü. Kin ajak pa ajanga moajang, aser parnoki pa dang tepelatsü ta ajatsü.

¹⁸Israel Tsüngrem KIBUBA temoatsüba, shiba kisüngi sayatenya inyaker.

¹⁹Pa sentsüwangshi tenüng tatem makai sangang, ali ajak pa sentsüwangshi agi süngdakjang, Amen aser Amen.

²⁰Idaki Yesse chir Dawid sarasadem tatem.