Read njo TENÜNGSANG KEN 73 Bible Online

TENÜNGSANG KEN 73 - njo bible

TENÜNGSANG KEN 73

¹Atangji Tsüngremi Israel dang ajunger. Shirnok temulung temerük lir parnok dang ajunger.

²Saka nibo kü tetsüng talangba oadoker liasü; Kü jenjang ajujitsü anasa liasü.

³Kechiaser ni asükümertem aser tamajungpur, azükaruba ngua tenük merem.

⁴Parnok temang anema aser tashi ita ali nung, tamajung pur tekangshi mali.

⁵Tangar ama parnok tekangshi mali, tangar ama parnok timtem mali.

⁶Anungji asükümerji parnok tekong nung azük ama; aser azü tokshibaji parnok sobutsü lir.

⁷Parnok tenük temo agi wakbanga mesonger, parnok mulungsentsü nungi tekülak moshir,

⁸Parnoki tatala aser tamajung atema jembir; tekangshitsü o parnoki kanga jembir.

⁹Parnoki anüng anema parnok tebang lapoker, aser parnok temeli alima sema senzür.

¹⁰Anungji nüburtem ajagi meyipa aor, aser moshia aliba tzüji ajemer.

¹¹Parnoki ashir, “Tsüngremi koda metet? Tematiba dak temetetba shisatsü lir ma?”

¹²Ajiang tamajungerji itemi lir; parnok rongsen arener aser jangratema alir.

¹³Kü mulungjang merüktetba aser tai makaba nung kü teka shitokbaji amajok asü?

¹⁴Ni anogo tepiyong kangshir, aser anepdang shia ni merenshir.

¹⁵Ni yamaji jembir ali asübo, ajiang, ni ne chirtem ashioktsür lila.

¹⁶Anungji ni ibaji angatettsü merang, saka ibai kanga tasak liasü;

¹⁷Oda ni Tsüngrem külemdaki or külenang, parnok tamajunger tatembangji angatet.

¹⁸Atangji nai parnok ali tanüla dak yutsü; aser tesamadak nai parnok endoker.

¹⁹Aoksa-a parnok nai samatsür, tetsübutsü agi parnok meshimeshia samatsüogo.

²⁰Kodang nisung ka sakdir pungmang noksa sama ama; Oh Kibuba, kodang na sakdir, nai parnok tebilemba amajok kümdakjang.

²¹Kodang kü mulung korema liasü aser kü nela jashia liasü,

²²Ni tamachi aser shisa maka, oda ne tsüngdang shiruru ama liasü.

²³Aji saka ni maneni ne den lir; nai kü teka tajichi nung sot.

²⁴Nai ne shisatsü agi ni anitsü; aser tatem nung sentsüwangshidaki anitsü.

²⁵Kotak nung ne dak alema ni asoshi shiba ali? Aser alima nunga ne dak alema ni aginüba shinga melika.

²⁶Kü shi aser kü mulungi tamakok nguaka, saka teti Tsüngrem kü mulungjang tashi aser shilem lir.

²⁷Saka shir na nungi talangka pilar lir, parnok atangji samatsü; shiri na senzüka toktsür, nai parnok samatsütsü.

²⁸Saka ni asoshi Tsüngrem anasa alibaji tajungtiba; ne mapa ajak indang ashitsüsa ni KIBUBA Tsüngrem kü jenokdak kümdaktsüogo.