Read njo TENÜNGSANG KEN 74 Bible Online

TENÜNGSANG KEN 74 - njo bible

TENÜNGSANG KEN 74

¹Oh Tsüngrem kechiba nai teti asoshi onok jendok? Kechiba ne chiyimdak aliba santem anema nai ain adoker?

²Nai akhidang alangzükba ne nübur kin koba nai ne senmangtsü asoshi alangzük, aji bilemtetang. Ano Zion tenem kong na ali aji bilemtetang.

³Iba teraksa tulu ya ajiang; tsükchirtemi tekülemdak kechisarena raksatsüogo.

⁴Na anemertemi ne tekülemdak nungi arrloktsüogo, takok anguba temaitsü parnoki idakji wako yuogo.

⁵Arem nung süng aleneri pu agi süng lensaba ama, parnoki itemji raksatsüogo.

⁶Idakji süng agi chitetba noksa ajak, parnoki pu aser yintem agi akusar.

⁷Parnoki ne tekülemdak mi agi rongdoktsüogo; aser parnoki ne tenüng alinung khenyongi memerüki kümdaktsüogo.

⁸Parnoki pei sasa ashi, “Onoki parnok khenyongi raksatsütsü,” parnoki linük ajak nung Tsüngrem külemdak ki rongtoktsüogo.

⁹Onoki temaitsü kecha mangu, joko ainkar kata mali, mesüra yamai kopiga alitsü onok rongnung shingaia meteta mali.

¹⁰Oh Tsüngrem, tsükchiri kopiga na mezüngmeshitsü? Tatem makai parnoki ne tenüng atalatsü ama?

¹¹Kechiba nai ne teka, oda ne teka tajichi sota ayur? Ne sübok nungi aji adokang aser parnok samajang.

¹²Aji saka, akhi nungi Tsüngrem kü Chuba lir, alima dangi ne tekümtet bener aru.

¹³ Nai ne tashi agi tzüyimji sadang, tzü nung aliba ngüm molutzürangtem kolak nai raksatsür.

¹⁴ Nai molu tzürang kolak anüka raksatsü, aser arem shiruru nem parnok chiyungtsü asütsü nai pa agütsü.

¹⁵Tzüpokdak aser ayongnutem asoshi nai lenmang paitsü, aser teti yima aliba ayong nai kongdaktsü.

¹⁶Anogo ne meyong, aonungjia ne meyong, Anü aser itaji nai renem.

¹⁷Alima tatembang ajak nai yanglu, nai mei aser tsüngkhüm yanglu.

¹⁸Oh KIBUBA tsükchiri na koda menütsü aji bilemtetang, tamashi nisungi ne tenüng atalaogo.

¹⁹Ne posü taküm arem shiruru nem tagütsü, sensaker taküm timtem nung aliba nai teti tamadok.

²⁰Ne tezüngzüktepba bilemtetang, kechiaser alima tammangdak ajak nung azütokshiba agi sünga lir.

²¹Kangshia alirtem maksüa temeyipdaktsü, sensaker aser makamaiteri ne tenüng sangdakjang.

²²Aramesoang, Oh Tsüngrem, aser ne indang jembiang, tamashi nisungi anogo tepiyong na menütsüba bilemtetang.

²³Ne tsükchirtem ola, na anemertemi asatepba koba ola maneni atur, aji tamadok.