Read njo TENÜNGSANG KEN 77 Bible Online

TENÜNGSANG KEN 77 - njo bible

TENÜNGSANG KEN 77

¹Timtem mapang ni Tsüngrem dang aja, ni Tsüngrem dang ayimten, aser pai kü dang anga.

²Kü timtemba anogo nung ni Kibuba bushi, aonung tepiyong kü teka mekanga liasü; Kü nela animesüngzüktet.

³Ni Tsüngrem bilemtetdang ni anünger; pa indang bilemdang kü nela lular. (Selah)

⁴Nai ni amua modaktsür; ni kecha mejembitettsü ta shisa bulur.

⁵Tesüiba anogotem indang ni bilemdanger; taoba kümtem indang ni bilemteter.

⁶Aonung ni kü mulung nung shisadanger; ni ontaker aser kü nelai yamai ashir:

⁷“Kibubai teti asoshi sentokdi ma? Pai kodanga asenok dang mejungli ma?

⁸Pa taochi teti asoshi sama asü? Pa tenangzükbatemji joko amajok asü?

⁹Aochia bilemtsü Tsüngremi amadok asü? Pai ain adokba agi pa taochi shibangadok asü?” (Selah)

¹⁰Aser ni ashi, “Ibai kü timtemji lir. Oda Tematiba teka tajichi ni atema kongadokogo.”

¹¹KIBUBA mapatem indang ni bilemtettsü, Hau, akhidang ne sayatenyatem ni bilemtettsü.

¹²Ano ne mapa ajak indang ni bilemdangtsü, Aser nai inyakbatem indang jembitsü.

¹³Oh Tsüngrem, ne lenmang temeshi lir, Ozü Tsüngrem uluba ama tangar tsüngrem shiba ali?

¹⁴Sayatenya inyakba Tsüngremji na; kintem dang nai ne tashi sayuogo.

¹⁵Nai neka agi ne nübur, Yakob aser Yosef chirtem alangtetogo. (Selah)

¹⁶Kodang tzüi na angu, Oh Tsüngrem, parnoki tsübua liasü.

¹⁷Mepettemi tzü aludaktsür; anüngtemi tsüngmok ola adokdaktsür; aser ne lijakjangtem ajakleni ao.

¹⁸Ne tsüngmok ola Tsüngrem mopung nung angashir; ne tsüngpreti alimaji sangwatsür; alimai atentener aser anokshir.

¹⁹Nai tzüsem ajanga jaja; nai tzüyim tarok ajanga süi, saka ne tsüngneptem angutsü makok.

²⁰Mosa aser Aron ket agi, sannüker ka ama nai ne nüburtem anishi.