Read njo TENÜNGSANG KEN 78 Bible Online

TENÜNGSANG KEN 78 - njo bible

TENÜNGSANG KEN 78

¹Oh kü nüburtem, kü tesayuba angang, kü bang otem nung nenok narong tenang.

² O entepba agi ni kü bang lapoktsü, Akhidang nungi miima aliba indang ni jembitsü.

³Koba onoki angashiogo aser metetogo, aser ozü tsüraburi onok dang shiogo.

⁴Onoki itemji par chirtem dang miima mayutsü saka tarutsü putu dang KIBUBA nüngsang; aser pa tashi aser pa tesüngmangtsü mapatem indang ashitsü.

⁵Kechiaser Yakob ajanga kuli ka pai renemogo, aser Israel nung ozüng ka yangluogo; itemji pei chirtem dang sayutsü asoshi pai asen tsüraburtem dang melaogo.

⁶Anungji tarutsü putu, oda tasotsü aliba tanurtemi aji metettsü; aser parnokia pei chirtem dang aji ashitsü.

⁷Aser parnoki pei tamang Tsüngrem dak ayutsü, aser Tsüngremer mapatem mamadoktsü.

⁸Anungji parnok par tsüraburtem, shir tekong temerang aser anema noktakba putu; shir temulung mesüngjem aser shir tanela Tsüngrem dak tamang makatet; iba putu ama parnok malitsü.

⁹Efraim chirtem, lijak agi raratsü renemer, tongbang anogo nung meyipa ao.

¹⁰Tsüngrem tezüngzüktepba parnoki mayu, Aser pa ozüng nung mejajatsü;

¹¹Aser parnoki pai inyakbatem, aser pai parnok dang sayuba sayatenyatem amadok.

¹² Ijip lima nung, Zoan moapu nung, Par tsürabur madang pai sayatenya inyak.

¹³ Pai tzüyimji sadang, aser parnok nem atendangdaktsü; aser tzüji jara ama noktakdaktsü.

¹⁴ Ano anüngdang mepet agi, Aser ammang tepiyong mi tesangwa agi, pai parnok ani.

¹⁵ Lisem lima nung pai lung jaksatsü, Aser tarok nungi ama parnok nem tzü talubosa jemdaktsü.

¹⁶Lung nungi pai ayong adokdaktsü; aser tzü ayong ama yima aludaktsü.

¹⁷Saka lisem lima nung Tematiba anema noktaka, parnoki pa anema taliang temenen mena,

¹⁸ Aser parnok chinütsü chiyungtsü meshia, parnok mulung nung parnoki Tsüngrem tendang.

¹⁹Hau, parnoki Tsüngrem anema jembi; parnoki ashi, “Arem nung Tsüngremi benjong agütsütsü kokdi ma?

²⁰Ajiang, ano tzü moshia adokdakja pai lung dak kongshi, aser ayongnutem moshia ayim; pai amtsüka agütsütetdi ma? Par nübur asoshi pai shi agütsütsü kokdi ma?”

²¹Anungji KIBUBAi angashi, aser rasa; aser Yakob anema mi ka apu, aser Israel anema ain adok.

²²Kechiaser parnoki Tsüngrem dak mamang, aser pa tekümtet tashi nung tamang maka.

²³Yongjia temalen anüngtem dang pai mela, aser kotak kishitem lapok;

²⁴ Aser pai parnok manung tachitsü asoshi mana tsükdaktsü, aser kotak nungi parnok nem chiyungtsü agütsü.

²⁵Nisungi kotaker amtsük achi; pai parnoki aginüba ajak parnok nem agütsü.

²⁶Pai anüng nung anüdok mopung ondaktsü; aser pai ain agi septsü mopung anishi.

²⁷Pai shi auyi ama, aser tashikang atenba ozü tzüyimkhüm lisem ama parnok manung tsükdaktsü.

²⁸Aser pai parnok anendak, parnok meketa aji tsükdaktsü.

²⁹Abenji parnoki chiyung aser tepok asüng. Kechiaser pai parnok nem parnok taginüba agütsü.

³⁰Saka parnok taginütsü den mepila dang, chiyungtsü ano parnok bang nung alidang,

³¹parnok anema Tsüngrem ain adok, aser parnok rongnung tashi taitbatem tepset. Aser Israel asangurtem telungi yok.

³²Yongjia ano parnoki temenen menajen mena, aser pa sayatenya mapa dak mamang.

³³Anungji parnok anogotem amajok nung, aser parnok kümtem timtem nung süidaktsü.

³⁴Pai parnok tepset tashi nungang, parnoki pa bushi; Aser parnoki temulung meyip aser temulung agüja Tsüngrem bushi.

³⁵Aser Tsüngremji parnok lung, parnok alangzüksang Tematiba Tsüngrem ta parnoki bilemtet.

³⁶Saka parnoki tebang agi pa tiyazü nung asang, Aser parnok temeli agi pa dang yazü.

³⁷Kechiaser parnok mulungjang pa den shitak maliasü. Mesüra pa tezüngzüktepba nung parnoki temulung malem.

³⁸Saka pa dak aria bilemba ali nung, pai parnok menen atok, aser mesamatsü; Hau, aiben dang pai ain madoki aremzük aser pa mit ajakbo madok.

³⁹Aser parnokji shi dang ta, aser mopung süia or meyipa maru medem to, ta pai bilemtet.

⁴⁰Kwiben arem nung parnoki pa anema apuso, aser lisem lima nung pa jashidaktsü!

⁴¹Aser parnoki ano Tsüngrem tendangjen tendang, Aser Israel Temeshisang jashidaktsü.

⁴²Parnoki pa teka, mesüra tsükchir nungi, pai parnok kümzükba anogo mebilemtet;

⁴³Koda Ijip lima Zoan moapu nung pai temaitsü aser sayatenyatem sayu, aji mebilemtet.

⁴⁴ Pai parnok ayongtem azü kümdaktsü, anungji parnok ayongnutem nungi parnoki mejemtet.

⁴⁵Pai manga lokti parnok dangi yok, koba agi parnok chima; aser allutem yok kobai parnok samadaktsü.

⁴⁶ Ano alu nung adokba osettem pai lungben nem, Aser parnoki inyaktetba jangkok nem agütsü.

⁴⁷Pai parnok tsükmenatzü lu rür agi raksatsü, aser mungu süngdongtem kanga temokong agi südaktsü.

⁴⁸Nashitem pai rür agi onsetdaktsü, aser parnok shirurutem tsüngi agi yisetdaktsü.

⁴⁹Pai parnok madaki tashi ain atakatem mit aser terasabatem; teraksatsüba tenyartem ama yok.

⁵⁰Pai pei ain adokba sota mayu, mesüra tasüba nungi parnok mekümzük; saka tashitak wara nem parnok agütsü.

⁵¹ Aser Ijip nung mezüng jabasotem, aser Ham süki nung parnok tashi tongtibatem tepset.

⁵² Saka pai pei nübur san ama anitet, aser shiruru telok ama arem nung parnok anishi.

⁵³ Aser parnoki metsübutsüsa pai parnok jungjunga anishi. Saka parnok tsükchirtem tzüyim agi mobang.

⁵⁴ Aser pai parnok pa temeshi tenem tashi anir aru, Oda pa teka tajichi agi yangluba iba tenem lima tashi.

⁵⁵Kintemjia parnok madang nungi pai aridok, aser parnok senmang lemsa-a arrtsü agütsü. Aser Israel kidongtem parnok pei süki nung lidaktsü.

⁵⁶ Yongjia Tematiba Tsüngrem anema parnoki atitang aser apuso, aser pa kulitem mayu;

⁵⁷Saka meyipa ao, aser par tsüraburtem ama külaka benshi; Ashikülak lijak ka ama parnok prepa-prepa ao.

⁵⁸Kechiaser parnok tokong külemba agi pa ain adokdaktsü. Aser parnok süngyanglu agi pa tenük meremdaktsü.

⁵⁹Kodang ya Tsüngremi angashi, pa kanga rasa. Aser Israel khenyongi sentok.

⁶⁰ Aji asünung nisungtem rongnung pa alidak süki Shilo nung Pai talidak sentok. Süki kong meimchir rongnung pa ali.

⁶¹ Tepuokdak alirtem nem pai pa tashi agütsü; aser Pa sentsüwangshi tsükchir ket nung agütsü.

⁶²Ano pai nübur pi nok nem agütsü, aser pa senmangertem dang rasa.

⁶³Mi agi asangurtem meyok; aser par aiürtemi kiyir ken maten.

⁶⁴Par putirtem nok agi asü, aser par amitsürtemi mang ayim.

⁶⁵Idangji mejangba nungi saker ama, yi agi meseper tashikari ayimtenba ama Kibubai shishi.

⁶⁶Aser pai pa tsükchirtem rongdong dak azük. Pai parnok teti asoshi mak südaktsü.

⁶⁷Iba dak alaka pai Yosef süki magizük, Aser Efraim kin meshim,

⁶⁸Saka pai meimba Zion tenem, Yihuda kin shim.

⁶⁹Aser pai pei temeshi tenladak anüng talang ama yanglu. Teti asoshi pai alima yangluzüka akaba medem.

⁷⁰ Ano pa kilir Dawida pai shim, Aser san telok rongnungi agitet.

⁷¹Mamatzü ayimba san sülen anitakba nungi pai pa nübur Yakob aser pa senmang Israel sannüker asütsü pai anir aru.

⁷²Anungji pai temulung tindang agi parnok sannüker aküm; Aser pa teka tetangshi agi parnok anishi.