Read njo TENÜNGSANG KEN 79 Bible Online

TENÜNGSANG KEN 79 - njo bible

TENÜNGSANG KEN 79

¹ Oh Tsüngrem, kintemi ne senmangdaki aitogo; Ne temeshi tenlaki parnoki menentsüogo; Parnoki Yirusalem raksatsüogo.

²Anüng nung ozütem chiyungtsü asoshi parnoki ne tenzüker temangtem agütsüogo, alima shiruru nem ne temeshi pur shi agütsüogo.

³Yirusalem meketa tzü ama parnoki parnok zü tokshiogo; aser parnok aremtsü shinga maliasü.

⁴Onok kiyongertemi onok sempar, aser onok meketa alirtemi sensatsür.

⁵Kopiga tashi, Oh, KIBUBA? Tatem maka na ain adokdi ma? Ne nükmeremji mi ama jangrudi ma?

⁶Na memetetba kintem madak, aser ne dang sarasadem masüba yimlitem madak, ne terasaba meküplokjang!

⁷Kechiaser parnoki Yakob meyokogo, aser pa talidak raksatsüogo.

⁸Ozü tsürabur temenentem onok anema nai tebilemtet. Ne taochi onok dangi yakta yokang. Kechiaser onok kanga dang luogo.

⁹Ne nüng sentsüwangshitsü, asoshi onok yariang. Oh ozü kümtetba Tsüngrem, onok kümzükang, aser ozü menen tokang.

¹⁰“Parnok Tsüngrem kong ali”, ta kechiba kintemi shidaktsütsü? Ne tenzükertem azü tokshia mang ayangbaji onoki ngua kin rongnung metetdakjang.

¹¹Puoka alirtemi anüngba ne dangi arudakjang. Ne ain tulu yari tasütsüpurji kümzükang.

¹²Oh Kibuba, koba tesempa agi parnoki na sempa, parnok teku dangi tenetben agi tali ozü kiyongertem dang tesempa shia agüjang.

¹³Idangjiang onok ne nübur aser ne chiyimdak chiyimer santemi, teti tatem maka ne tenüng asangtsü. Putusa putu onoki ne nüngsang metetdaktsütsü.