Read njo TENÜNGSANG KEN 80 Bible Online

TENÜNGSANG KEN 80 - njo bible

TENÜNGSANG KEN 80

¹ Oh Israel sannüker, Na shibai Yosef san ama anishir, tenarong tenang; na shiba Cherubim madak amen, sentsüwangshiang.

²Efraim o Benjamin aser Manase madang, ne tashi akasoang, aser onok kümzüktsü arung.

³Oh Tsüngrem, ano onok yanglushijang; aser onok kümzüktsüa ne tejak sayuang.

⁴Oh, Temeranger KIBUBA Tsüngrem, ne nüburi sarasademba anema nai kopiga ain adoktsü?

⁵Nai nüktzü agi parnok pok süngdaktsüogo. Aser tajemtsü nüktzü talubosa agütsüogo.

⁶Onok kiyongertem asoshi nai onok tatalaba ka kümtsür, Aser parnok rongnung ozü tsükchirtemi menütsür.

⁷Oh Temeranger Tsüngrem, ano onok mesoang; aser onok kümzüktsü, asoshi ne tejak onok dak yalokjang.

⁸Ijip nungi nai tsükmenatzü zü ka bener adok; nai kintem aridok, aser aji atem.

⁹Iba asoshi nai ali tusa, aser aji tera yanga ai, aser alima asüng.

¹⁰Iba akhüm agi tenemtem nembang, aser iba kongsangtemji Tsüngremer cedar dong ama liasü.

¹¹Tzüyim tonga ajagi pei kongsang asang, aser ayongji tonga iba süngsem meyi.

¹²Ajangla süisüponger ajaki aji metsükzüktsüsa, nai kechiba iba atsü raksatsü?

¹³Arem nungi pungzüi aji mokungsar, aser moapu nung arem shirurutemi aji achir.

¹⁴Oh Temeranger Tsüngrem, onoki ne dang mepishir, ano meyipang. Kotak nungi ajizüka yokang, aser ajiang, aser iba tsükmenatzü tezü anebaluang.

¹⁵Koba neka tajichi agi atemba dong, aser na atema nai tashi itdaktsüba kongsang.

¹⁶Aji mi agi aronger; aji lepzükogo. Nai ain adoka parnok dak reprangang aser parnok samajang.

¹⁷Ne teka tajichi nisung manung nai ametang. Oda nisung chir shiba nai pei atema tashi itdaktsü.

¹⁸Anungji onok na nungi meyipa maotsü. Nai onok nem taküm agüjang, onoki ne dang sarasademtsü.

¹⁹Oh Temeranger KIBUBA Tsüngrem, onok ano mesoang; aser onok kümzüktsü asoshi ne tejak onok dak yalokjang,