Read njo TENÜNGSANG KEN 83 Bible Online

TENÜNGSANG KEN 83 - njo bible

TENÜNGSANG KEN 83

¹Oh, Tsüngrem na ajem ajema teli; Nai o jembiang, aser ajemajema teli, Oh, Tsüngrem.

²Kechiaser, ajiang, ne tsükchirtemi rongronger. Aser ne sempartemi parnok kolak angaka tuogo.

³Ne nübur anema parnoki tekülak tasa yanglur, aser nai awabanga alir anema parnoki o bangjemer.

⁴Parnoki ashir, “Arung, parnok kin ka mekümdaktsüi samatsüdi; oda Israel tenüng joko mebilemtettsüsa.”

⁵Hau, parnok ka küma mulungtepogo; Na anema parnoki tenangzükba ka yangluogo.

⁶Edom o Ishmael nunger na süki, Moab, aser Hagar nunger;

⁷Gebal, Ammon, aser Amalek; Tair nunger den Filistia;

⁸Asiria-a pa den semlokogo; Parnokji Lot chirtem asoshi tashi tait teka lir. (Selah)

⁹ Midian nunger dang ama, Kishon ayong nung, Sisera o Yabin dang ama, nai parnok dang benshiang;

¹⁰Shirnok Endor nung sama, Shir ali asoshi jana ama aküm.

¹¹ Parnok tulurtem Oreb ama kümdakjang; Hau, parnok yimsüsür ajak Zeba aser Zalmunna ama kümjang;

¹²Shirnoki ashi, “Tsüngrem talidakji asenoki makdi arung.”

¹³Oh kü Tsüngrem, yima aoba auyi ama, mopung madang tsüksü ama, parnok kümjang.

¹⁴Arem mi agi merok ama, aser milak agi tenemtem arongba ama.

¹⁵Yamaji ne tsüngsak agi parnok arishiang, Aser ne yipru agi aoksajang.

¹⁶Oh KIBUBA, parnoki ne tenüng bushitsüsa, parnok tejak maksü agi süngjang.

¹⁷Parnok maksüdakjang aser teti asoshi temulung makai kümjang; hau, parnok mangmangdakjang aser samadakjang;

¹⁸Oda parnoki na dang, shiba tenüng KIBUBA lir, Alima ajak madak Tematiba ta metetdakjang.