Read njo TENÜNGSANG KEN 86 Bible Online

TENÜNGSANG KEN 86 - njo bible

TENÜNGSANG KEN 86

¹Oh KIBUBA, ne narong kü tsütsü shiang; aser kü dang langzüang. Kechiaser ni sensaker aser maka-mait.

²Kü taküm kümzüka yuang; kechiaser ni Tsüngrem tsübur; na kü Tsüngrem, ne dak amangba ne kilir kümzükang.

³Oh KIBUBA, kü dang aochiang. Kechiaser anogo tepiyong ni ne dang ajeber.

⁴Ne tenzüker taküm peladakjang, kechiaser, Oh Kibuba, ne dangi kü taküm mesor.

⁵Kechiaser, Kibuba na tajung aser tai atoktsü renema lir, aser ne dang ajar ajak dang temeim taochi nung talubosa agütsür.

⁶Oh, KIBUBA kü sarasadem angang, aser ni mepishiba ola angang.

⁷Timtemba anogo nung ni ne dang ajatsü; kechiyong nai kü dang langzütsü.

⁸Oh Kibuba, tsüngremtem rongnung na ama shinga mali. Ano ne mapa ama tanga kecha mali.

⁹Oh KIBUBA, nai yangluba kin ajaki arua ne madang külemtsü; Aser parnoki na sentsüwangshitsütsü.

¹⁰Kechiaser na tulu, aser sayatenya mapa inyaker. Na dang Tsüngrem lir.

¹¹Oh, KIBUBA, kü dang ne lenmang sayuang. Ne ochishiba nung ni jajatsü; ne tenüng tsübutsü asoshi kü mulung lungjemjang.

¹²Oh Kibuba kü Tsüngrem, kü mulung ajak agi ni na asangtsü. Ni ne nüng tatem maka sentsüwangshitsütsü.

¹³Kechiaser kü dang ne temeim taochi kanga tulu; aser tekübokba Sheol nungi nai kü taküm kümzükogo.

¹⁴Oh Tsüngrem, ni anema asükümer apusor, teka air telok kati kü taküm arishiogo, aser parnoki na züngoka mali.

¹⁵Saka, Oh Kibuba, na temeim yimlibilem aser taochi Tsüngrem; ain adoktsü meilungi, temeim taochi aser ochi nung talubosa.

¹⁶Kü dangi meyipang, aser kü dang aochiang. Ne kilir nem ne tashi agüjang, aser ne kilitsür chir kümzükang.

¹⁷Teti asoshi kü dang temaitsü ka sayuang, oda ni sempartemi aji ngua mak asütsüsa. Kechiaser, KIBUBA, nai ni yariogo aser ni süneptsüogo.