Read njo TENÜNGSANG KEN 88 Bible Online

TENÜNGSANG KEN 88 - njo bible

TENÜNGSANG KEN 88

¹Oh KIBUBA, kü kümtetba Tsüngrem, ni ne madang ammang sangwa jebogo.

²Kü sarasadem ne dangi arudakjang. Ni ajepba nai angang.

³Kechiaser kü taküm timtem agi sünga lir, aser kü taküm Sheol anasa lir.

⁴Shirnok kanglai alur, parnok den nia züngsemer. Ni teyari maliba nisung ka ama lir.

⁵Tasür rongnung endokba ama tepsetbatem leper nung mejanga ali ama; shiba nai joko mebilemteter, aser neka agi parnok leptangogo.

⁶Teküboktiba kangla nung, tammangdak, tarokdak, nai ni yutsüogo.

⁷Na rasaba agi ni nenseter, aser ne tzüsem ajak agi nai ni kangshir. (Selah)

⁸Kü tembartem kü dang nungi nai talangka odaktsü. Parnok dang niji tesempatsü ka nai kümtsü. Ni shibanga lir, aser ni madokteter.

⁹Timtemba agi kü tenük ramia aor; Oh KIBUBA, ni anogo shia ne dang sarasademogo. Ne dangi teka mekangogo.

¹⁰Tasür asoshi nai sayatenya inyakdi ma? Tasürtemi shia arua na sangdi ma? (Selah)

¹¹Leper nung ne temeim taochi sangoktsüdi ma? Mesüra Teraksatsüsang dang ne temulung lemtetba indang shidi ma?

¹²Tammangdak ne sayatenyatem shitetdi ma? Tammangdak lima nung ne temeshiba bilemtetdi ma?

¹³Saka, Oh KIBUBA, ni ne dang jebogo; aser anepdang kü sarasadem ne dangi arutsü.

¹⁴KIBUBA, nai kechiba kü taküm sentoker? Küdang nungi kechiba nai ne tejak miimer?

¹⁵Ni lanuwa nungi timtemer aser tasür; ne taoksatsü agi ni kangshidang ni koda masür.

¹⁶Ne mit tesashi ni ajanga ogo; ne taoksatsü agi ni leptangogo.

¹⁷Anogo tepiyong tzü ama parnok aru; parnoki ni khenyongi meketbang.

¹⁸Temeimer o tembar, aser kü adianutem tammangdaki odaktsü, ni nungi nai talangka toktsüogo.