Read njo TENÜNGSANG KEN 89 Bible Online

TENÜNGSANG KEN 89 - njo bible

TENÜNGSANG KEN 89

¹KIBUBA temeim taochi indang ni teti ken atentsü. Putu ajak dang ne temulung lemtetba indang ni kü bang agi sangoktsütsü.

²Ne temeim taochiji teti tatem makai yanglutsü ta ni shiogo. Ne mulung lemtetbaji anüngtem ama akanga lir.

³Ni shiogo, “Ni shimtetba den ni tezüngzüktepba ka yangluogo; kü kilir Dawid dang ni azüngashiogo.

⁴ Ne metsü teti tatem makai ni tenzüka toktsütsü. Aser putu ajak asoshi ne chuba menden yanglutsütsü.” (Selah)

⁵Oh KIBUBA, anüngi ne sayatenya sangdakjang. Temeshipur mungdangdak ne temulung lemtetba sangdakjang.

⁶Kechiaser anüng nung alir shibai KIBUBA den medemdangtet? Kotak tsüngrular rongnung KIBUBA ama shiba ali?

⁷Temeshipur mungdangdak Tsüngremji kanga tetsübutsü, Aser pa meketa alir ajaki paji tsübutsü.

⁸Oh Temeranger KIBUBA Tsüngrem, KIBUBA, na ama tashi tait shiba ali? Aser ne temulung lemtetba na meketa lir.

⁹Nai tashi tait tzüyim madak chubar; iba tzüsem adokdang nai itemji anendaktsür.

¹⁰Nai Rahab tetepsetba ka mesüka, anükanüka raksatsüogo. Ne tashi agi tsükchirtem nai jenshidaktsüogo.

¹¹Anüngji ne indang, alijia ne meyong. Alima aser angji aliba ajak, nai yangluogo.

¹²Septsülen aser tentsülen, nai itemji poktetdaktsüogo. Ne tenüng nung Tabor aser Hermoni pelapeter.

¹³Na tashi tait tepen ka lir, ne teka tashi tait aser neka tajichi talang.

¹⁴Temeshiba aser ochi o bendangbaji ne chuba menden kimung. Ne jakdang temeim aser ochi aor.

¹⁵Benjong ola metetba nübur tepelatsü. Oh KIBUBA, parnoki ne tejak tesangwa nung jajar.

¹⁶Ne tenüng nung parnok anogo tepiyong pelateper. Aser ne temeshiba nung parnok uludaktsür.

¹⁷Kechiaser parnok tashi sentsüwangshiji na; aser nai ajungba ajanga onok tezü ajongkettsü.

¹⁸Kechiaser ozü jong KIBUBA meyong; aser ozü chuba Israel Temeshibar meyong.

¹⁹Idangji ne temeshipur dang nai mangdang nung jembi, aser ashi, tashi iter ka manung ni korang yutsüogo. Nübur nungi shimtetba ka ni ajungket.

²⁰ Ni kü kilir Dawid bushitetogo. Kü temeshi totzü agi ni pa mezüja shimogo.

²¹Pa den kü teka semloktsü. Kü teka agi ni pa tashi itshidaktsütsü.

²²Tsükchir jagi pa mekülakoktsütsü, mesüra tamajungeri pa meludaktsütsü.

²³Aser pa madang ni pa anemer ludaktsütsü, aser pa dang sempartem dak azüktsü.

²⁴Saka kü temulung lemtetba aser kü temeim taochi pa den alitsü; aser kü nüng nung pa tezüji ajungkettsütsü.

²⁵Ano pa tekajia tzüyim manung, aser pa teka tajichi ayongtem nung, ni toktsütsü.

²⁶Pai kü dang ayimtentsü, “Na kübu, kü Tsüngrem, aser kü kümtetba lung.”

²⁷ Ano pa kü jabaso tambu, Aser alima chuba rongnung tematiba, kümdaktsütsü.

²⁸Teti tatem maka kü temeim taochi ni pa asoshi yuadoktsü. Aser kü tezüngzüktepba pa den akanga alitsü.

²⁹Aser pa chuba mendenji kotaker anogo ama, teti tatem makai ni lidaktsütsü; pa metsüji teti chuba alitsü.

³⁰Par chirtemi kü ozüng toktsüra, aser ni melaba nung mejajara;

³¹parnoki ni tenteta akaba raksara, aser ozüngtem mebenshira;

³²idangji parnok teraksaba anema ni ajok agi merenshitsü. Aser parnok menen anema ni azüktsü.

³³Saka kü temeim taochi ni khenyongibo pa dang nungi bener maotsü, mesüra kü temulung lemtetba meludaktsütsü.

³⁴Kü tezüngzüktepba ni meraksatsü, mesüra kü bang nungi tuguba memelenshitsü.

³⁵Kü temeshiba agi ni ken azüngashialajibo; ni Dawid dang meyazütsü.

³⁶Pa metsü teti tatem maka alitsü; aser kü madang anü ama pa chuba menden alitsü.

³⁷Ita ama aji teti tatem maka tenzüka toktsütsü, aser anüng nung teti asoshi kuli ama aji alitsü. (Selah)

³⁸Saka tang nai pa endokogo aser malizük, nai shimtetba anema nai ain adokogo.

³⁹Ne kilir den tezüngzüktepba nai sendokogo. Pa chuba korangji aut nung tsükdakja nai menentsüogo.

⁴⁰Nai pa atsü ajak raksatsüogo; nai pa mitsa laodaktsüogo.

⁴¹Süisüponger ajaki pa dak rakzükraktemer; par kiyonger madang pa tesempatsü ka kümogo.

⁴²Nai pa tsükchirtem teka tajichi uludaktsüogo. Nai pa tsükchir ajak peladaktsüogo.

⁴³Hau, nai pa nok techira noktanger, aser tongbang nung nai pa den masem.

⁴⁴Nai pa sentsü remdaktsüogo, aser pa chuba menden ali-i ludaktsüogo.

⁴⁵Pa lanuwa mapang nai tatsüba kümdaktsüogo. Nai pa maksü agi süngtsüogo.

⁴⁶Oh, KIBUBA, kopiga? Nai teti tatem maka atsüka lidi ma? Ne ain mi ama kopiga arongtsü?

⁴⁷Oh kü mapang koda tatsü, aji bilemtetang. Nisung chir ajak amajok nung yanglu!

⁴⁸Sheol ain nungi pei tanela sottsüsa, alima nung taküm alir shiba masütsü? (Selah)

⁴⁹Kibuba, nai temulung lemtetba tensa Dawid dang nai nangzükba mezüng temeim taochi kong ali?

⁵⁰Kibuba, ne kilirtem maksü bilemtetang. Tashi tulu kintemi sempaba ni kü mulung nung koda aremer.

⁵¹Koba ajanga, Oh KIBUBA, ne tsükchirtemi sempaogo, Koba ajanga nai shimtetba aolen parnoki sempaogo.

⁵²KIBUBA teti tatem maka temoatsü sang! Amen, aser Amen.