Read njo TENÜNGSANG KEN 9 Bible Online

TENÜNGSANG KEN 9 - njo bible

TENÜNGSANG KEN 9

¹Ni kü mulungjang ajak agi na sangdi, Oh KIBUBA. Ne tesüngmangtsü mapa ajak indang ni ashitsü.

²Na asoshi ni tepela agi ken tendi, ne nüngsang ken ni tendi, Oh tematiba Tsüngrem.

³Kodang kü tsükchir meyip; parnok ne madang lao aser sama.

⁴Kechiaser nai kü tsütsü shia o bendangogo. Ne chuba menden nungi nai ochi o bendanger.

⁵Nai bendanger kintem arütsüogo, aser tamajungertem samatsüogo. Nai parnok tenüng tatem makai aidokogo.

⁶Tsükchirji tatem makai samatsü. Nai parnok yimtitem atsüdokogo, aser parnok meshi meshia amadokogo.

⁷Saka KIBUBAi tatem makai chubar. O bendangtsü asoshi pai pei chuba menden renemogo.

⁸Temeshiba agi pai alima o bendangtsü; aser pai ochi agi nüburtem madak yimsü asütsü.

⁹Ajemrepa alirtem asoshi KIBUBAji jenokdak lir, timtem mapang mitsa tulu.

¹⁰Shirnoki ne tenüng metet, parnoki ne dak temulung alemtsü. Kechiaser KIBUBA, shirnoki na bushir, nai parnok kodanga senzüka metoktsütsü.

¹¹Zion chuba menden nung amenba, KIBUBA dang tenüngsang ken tenang. Pai inyakba mapatem nübur rongnung ayimokjang.

¹²Kechiaser Tsüngremi timtemba pur bilemtettsü. Parnoki ayimtenba ola pai mamadoker; aser shiri parnok timtemdaktsür, pai parnokji merenshitsü.

¹³Kü dang aochiang, Oh KIBUBA! Kü tsükchirtemi ni timtemdaktsüba reprangang; tasütsüba nungi ni kümzükang, Oh KIBUBA.

¹⁴Anungji Zion jala süngkhüm nung, ni ne nüngsang metetdaktsütsü, aser ne tekümzük nung pelatsü.

¹⁵Pei sasa yangluba kangla nung, bendanger kintem asongogo. Parnoki mesanga ayuba sang nung parnok tetsüng puogo.

¹⁶KIBUBAji pa ochi obendang agi meteter. Tamajungerji pei teka mapa nung puogo. (Higgaion Selah)

¹⁷Tsüngrem amadokba kintem ajak; tamajungertemji leperi shilangtsü.

¹⁸Nüngdakba purtem tetibo mesendoktsü, mesüra sensaker teimla tetibo mesamatsü.

¹⁹Aramesoang, Oh KIBUBA, nisung nem tekokdaktsü; kintemji ne madang o bendangdakjang.

²⁰Parnok tetsübu nung yujang, Oh KIBUBA; kintem nem parnok nisung dang ta metetdakjang (Selah)