Read njo TENÜNGSANG KEN 90 Bible Online

TENÜNGSANG KEN 90 - njo bible

TENÜNGSANG KEN 90

¹Oh Kibuba, putu ajak nung, na ozü talidak süa aruogo.

²Tenemtem makümdang, mesüra ali aser alima meyangludang, oda teti tatem makaba mapang nungi, na Tsüngrem.

³Nai nisung auyi kümtsür, aser ashir, “Nenok nisung chirtem, shilangang.”

⁴ Kechiaser ne tsüngdangbo küm meyi kajia yashi ama dang, aser ammang nung mitkar ka ama lir.

⁵Tzümetsüng agi ama nai parnok punger aor; parnok pungmang ka ama; anepdang parnok ai ka meyi ama,

⁶anepdang aji apunger aser ainer; nikongdang aji azülar, aser asür.

⁷Kechiaser ne ain agi onok rongsar, Aser ne mit agi onok koda masür.

⁸Ozü menen ne madang nai yutsüogo, onok kipok menen ne tejak tesangwa nung lir.

⁹Kechiaser ne mit nung ozü arishi ajak süitemer. Tangula ka ama ozü arishi onoki temdaktsür.

¹⁰Ozü arishi anogo tenemer metsü; mesüra arishiaka küm lir anasü-ang. Yongjia parnok arishiji oda timtem aser tejashi-ang. Kechiaser aji yakta atemer, aser onok yima aor.

¹¹Ne ain adokba tashi, aser ne dang tsübutsü tim kodaka; patakaji ne mit, aji shibai metettsü akok?

¹²Anungji onoki shisa taka mulungjang ka ngutettsüsa, onok arishi anogo azüngtsü sayuang.

¹³Kopiga tashi ne ain adokba alitsü? Ne kilirtem dang Oh KIBUBA temeim sayuang,

¹⁴Oh ne temeim taochi agi anepdang onok jangratemjang. Oda onoki arishi tepiyong pelatepjen pelatsüsa.

¹⁵Nai onok kangshiba anogotem yari, aser onok temenen anguba kümtem yari, nai onok peladakjang.

¹⁶Ne kilir dangi ne mapa, aser ne chirtem madang, ne sentsüwangshi jungkai adokjang.

¹⁷Aser ozü Tsüngrem KIBUBA temulung achiba onok manung liang. Aser onok manung onoki inyaktetba mapa tashi itjang; Hau, onoki inyaktetba mapa nai moajang.