Read njo TENÜNGSANG KEN 92 Bible Online

TENÜNGSANG KEN 92 - njo bible

TENÜNGSANG KEN 92

¹KIBUBA nem tenüngsang agütsütsü, aser Oh Tematiba, ne tenüng asoshi tasangba ken atentsü kanga junger.

²Anepdang ne temeim taochi, aser aonung shia ne temulung lemtetba sayutsü asoshi,

³tatemba ter aketba jemji, aser tzürang kongki; aser ola nema adokba kongki agi.

⁴Kechiaser Oh KIBUBA, nai ne mapa ajanga ni pelatsüogo; neka mapa nung ni takok ngua pelatsü.

⁵Oh KIBUBA, ne mapatem koda tulu! Ne tebilemba-a kanga tarok.

⁶Suwar nisungi ya memetet; Mesüra tamachi-i ya mangateter.

⁷Kong tamajunger ai ama adokdir, aser kodang temenen inyaker ajak azükarudir, ibaji parnok teti tatem maka samadaktsütsü mapang.

⁸Saka Oh KIBUBA, na teti tatem maka temalen lir.

⁹Saka, Oh KIBUBA, ne tsükchirtem ajiang. Kechiaser ajiang, ne tsükchirtem samatsü; temenen inyaker ajak prokshitsü.

¹⁰Saka sü tezü ama nai kü tezü temai tudaktsüogo. Nai totzü tasen agi ni mezüja shimteter.

¹¹Kü tsükchirtem laoba kü tenük agia nguogo; Ni anema apusoba temenen inyakertem tia kü narong agi angashiogo.

¹²Seradong ama temeshiba nisung azükarutsü; Lebanon nung cedar ama pa meitsü.

¹³KIBUBA kidang parnok tema lir. Ozü Tsüngrem talidak parnok azükarutsü.

¹⁴Tasa mapang nung parnoki ano süngjang tangtsütsü; parnok süngtzü agi sünga kümyanga alitsü.

¹⁵KIBUBAji indang indanga lir ta sayutsü meji; pa kü lung lir, aser pa dak memeshiba mali.