Read njo TENÜNGSANG KEN 95 Bible Online

TENÜNGSANG KEN 95 - njo bible

TENÜNGSANG KEN 95

¹Oh arung, KIBUBA dang asenoki tendi arung. Asen tekümtet lung dang asenoki tepela ola yokdi arung.

²Tenüngsang agi asenoki pa tsüngdangi odi arung; Tenüngsang ken agi asenoki pa dangi tepela ola yokdi arung.

³Kechiaser KIBUBAji Tsüngrem tulu ka lir, aser tsüngremtem ajak madak Chuba tulu ka lir.

⁴Pa ket nung alima tarokdak lir; tenem kolaktemjia pa meyong.

⁵Tzüyim pa meyong, kechiaser pai aji yanglu; kechiaser pa ket agi ali takongji yanglu.

⁶Oh arung, asenoki külemdi aser apudakdi. Asen Teyanglur KIBUBA madang asenoki apudakdi.

⁷ Kechiaser pa asen Tsüngrem, aser asenok pai mesüba purtem, aser pa meyong santem. Tanü, Oh onoki pa ola angala sang!

⁸ Meriba nung amato, arem nung Massa anogo nung ama, nenok temulung temerang.

⁹Koba mapang nung ner tsüraburi ni atidang, tendang, aser kü mapa angu;

¹⁰iba putu den ni küm lir tashi ain adok, aser ashi, “Ibai parnok mulung nung mashileni aoba kin ka lir, aser parnoki kü lenmang mezüngshir.”

¹¹ Aji asünung “Parnoki kü anisüngzükdaki maitsüla” ta, Ni rasa-a azüngashi.