Read njo APIJEMTSÜ SHIN 1 Bible Online

APIJEMTSÜ SHIN 1 - njo bible

APIJEMTSÜ SHIN 1

¹ Israel chuba, Dawid jabaso Solomon Apijemtsü shin:

²Nisungi tashitemetet shisatsü aser tesayuba metettsü; tengujemtsü otem angatettsü;

³Shisa ka-a benshiba nung, temeshiba nung, ochiba nung, tindangba nung tesayuba angutsü asoshi;

⁴Tongmelanger nem shisatsü, lanur nem temetetba aser teshisadangba agütsütsü asoshi;

⁵ano tashi temetet nisungi angashitsü, aser tangazükba nung renloktsüsa; aser tangatetba nisungi sayutsüngi tajung ngutettsü asoshi;

⁶Apijemtsü shin aser rateta sayuba o, tashitemeteter otem aser parnoki ratamatatsüsa jembibatem angatettsü asoshi.

⁷KIBUBA tsübubaji shisatsü tetenzük lir; saka suwari tashitemetet aser tesayuba sempar.

⁸Kü chir, nebui sayuba angang; aser netsüi ashiba senzüka teyutsü.

⁹Kechiaser parnokji ne kolak nung mera taket narozük, aser ne tekong nung azük asütsü.

¹⁰Kü chir, temenen puri na mesüzükra, Nai hai-haura teka.

¹¹Parnoki yamai shia, “Arung, asenoki azü tokshitsü asoshi atsüka atadi; asenoki kecha tai maketbatem asoshi arür mendi;

¹²asenoki parnok leperi ama taküm rangben meyokdi, aser kanglai aiba pur ama,

¹³senti oset ajak aseni angutsü; terakzükba agi asenoki asen ki asüngtsü;

¹⁴na onok rongnung ka kümang. Asenok juli ka asütsü.”

¹⁵Kü chir, parnok lenmang nungji nai tejaja. Parnok lenmang nungi ne tsüng paizükang.

¹⁶Kechiaser parnok tetsüng temenen leni asemer, aser azü tokshitsü asoshi parnoki ariteper.

¹⁷Kechiyong ozü kati danga ngudakja sang mesangbaji amajok.

¹⁸Saka itemi pei meyong zü asoshi atsüka atar; parnoki pei taküm asoshi arür amener.

¹⁹Tajangzük asoshi teka yia merumeruba nisung ajak lenmang yamaji. Iba jagi pei meyong takümji dang agia adoker.

²⁰ Tashitemeteti yimtong nung ayimtener; Watidak lai la ola adoker.

²¹Mazüngi aliba lenmang nung lai ayimtener; yimti süngkhümbong züngdang lai la otem jembir.

²²“Nenok tongmelangertemi kopiga tongmelang shisatsü meimtsü? Sensamasartemi sensamasaba nung kopiga pelatsü, aser suwartemi tashitemetet kopiga sempatsü?

²³Ni arütsüba nung temulung tenang; nenok madak ni kü shisatsü meküploktsütsü; ni kü otem nenok nem meteta kümdaktsütsü.

²⁴Kechiyong ni jar nenoki manga; ni kü teka mekang aser shingai mezüngshi;

²⁵aser nenoki kü kipok sayutsüngi ajak amajok kümdaktsü, aser ni arütsüba kata hau ta mali.

²⁶Nia nenok lendong anogo nung menütsütsü; nenok taoksatsü arudang ni atalatsü.

²⁷Kodang taoksatsü yipru ka ama ne dangi arudir, aser ne lendong Tsüngrem mopung ka ama arudir; kodang timtem aser tokrong nenok madak arudir;

²⁸idangji parnoki kü dang ajatsü, saka ni melangzütsü. Parnoki ni nendaka bushitsü, saka parnoki ni mangutsü.

²⁹Kechiyong parnoki shisatsü sempa, aser KIBUBA tsübuba meshim.

³⁰Aser parnoki kü kipok sayutsüngi kata hau ta mali. Parnoki ni arütsüba ajak sensatsü.

³¹Anungji parnoki inyakzükba süngjangji parnoki achitsü. Aser parnok kelakkübongba tasa agi asüngtsü.

³²Kechiyong tongmelanger meyipa aoba jagi parnok lepsettsü. Aser suwartem mekümdangi sadoka aliba jagi parnok samatsütsü.

³³Saka shibaisa kü dang angadir kümzüka alitsü, aser temenen tetsübu makai sadema alitsü.”