Read njo APIJEMTSÜ SHIN 10 Bible Online

APIJEMTSÜ SHIN 10 - njo bible

APIJEMTSÜ SHIN 10

¹Solomon apijemtsü shin: Shisa taka chir kati tebu peladaktsür; saka tamashi jabaso kati tetsü shisa amsadaktsür.

²Tamajung agi ajangzükba rongsenji kecha tajangzük mali; saka ochishibai tasüba nungi kümzüker.

³KIBUBAi ochishir ya-a metoktsür, saka temenenpuri sapubaji pai endoktsür.

⁴Anüalemba teka agi sensak atener; saka teinyak teka agi takar kümdaktsür.

⁵Shibai meiwa bendener pa tekümdang jabaso; saka shibai aluruwa mejanger pa maksü bena aruba jabaso.

⁶Ochishir kolak manung temoatsütem lir; saka tamashir tebang rasarabong agi sünga lir.

⁷Ochishir bilemtetbaji temoatsü ka; saka tamashi tenüngji shizüka aotsü.

⁸Temulung nung shisa akari ozüngtem agizüktsü, saka tamashi tebang atener laotsü.

⁹Shibai indang indanga jajar pai lendong makai jajar, saka shibai pei aolen meyipshir pa putettsü.

¹⁰Shibai tenük atsüker pai lendong adokdaktsür; saka shibai tasü ita arütsür pai yimjung yanglur.

¹¹Temeshipur tebangji taküm tzüpokdak; saka tamajunger tebang rasarabong agi sünga lir.

¹² Tesempatep agi rarabangsen adokdaktsür; saka temeimi tai ajak nembanger.

¹³Tangatetba akasang tebang nung tashitemetet angur; saka tangatetba nung anünger rongdong asoshi artsüng langa lir.

¹⁴Shisa akari shisatsü rizünger; saka tamashir asa-apungbaji teraksa anasa lir.

¹⁵Takar nisung rongsenji tashi tait yimtiji lir; saka sensaker makabaji parnok teraksa.

¹⁶Temeshipur taa agi taküm dangi anir; saka tamajunger tajangzük agi temenen dangi anir.

¹⁷Tesayuba nung temulung agütsürji taküm lenmang nung lir, saka tarütsüba shibai senzüka yutsür pai mashileni aor.

¹⁸Yazü yapong tebangmechi nung sempatep lir, shiri tetsükchi o jembir paji tamashi lir.

¹⁹O jenti nung ozüng raksaba anünga mali; saka shibai pei bang soter pa tekümdang.

²⁰Temeshipur temeliji taribi takutet mesük; saka temenenpur tebilembaji tagidak maka.

²¹Temeshipur tebangi jenti pur mesür; saka tamashir tangatetba nung anüngba yong asür.

²²KIBUBA temoatsü agi takar kümdaktsür; aser iba denji pai tejashi kecha mebendenloker.

²³Tamashir tsüngdang tiyazü benshitsüji tasayatsü amai dang; saka tangatetba nisung tsüngdang, shisa ka-a inyakabaji jangratemtsü ka.

²⁴Temenenpuri kechi tsübur,aji pa dak alatsü, saka temeshipur taginübaji melatsü.

²⁵Yipru mopung aitdang temenenpurji meli-i akümer, saka temeshipurji tatem maka tenteta lir.

²⁶Tepu asoshi tasentzü, aser tenük asoshi mokozü ama, azümesenerji pa yokba pur tsüngdang lir.

²⁷KIBUBA tsübuba jagi arishi atsülanger, saka tamajunger arishi tatsüba akümer.

²⁸Temeshipur teimlaji tepela nung atemer, saka temenen puri imlabaji kecha makümer.

²⁹Tindanger asoshi KIBUBA lenmangji mitsa, saka temenen inyakertem asoshi aji tesamatsüba alitsü.

³⁰Temeshipur kodanga magientsü, saka tamajunger alima nungji malitsü.

³¹Temeshipur tebangi tashitemetet adokdaktsür, saka mashikoshi temeliji rangtoktsü.

³²Temeshipur tebangi kechi tagizüktettsü aji metet; saka tamajunger tebangi mashikoshiba kechi, aji metet.