Read njo APIJEMTSÜ SHIN 11 Bible Online

APIJEMTSÜ SHIN 11 - njo bible

APIJEMTSÜ SHIN 11

¹Tiyazü seret KIBUBA tsüngdang tesempatsü; saka ochi touzükbaji pa tepelatsü.

²Kodang asüküm arur, idangji maksü arur; saka ajemalur den tashitemetet lir.

³Teindanger ochishiba agi anitsü; saka ashikülakertem mashikoshiba jagi parnok samatsütsü.

⁴Terasaba anogo nung rongseni kecha majangzüker; saka temeshibai tasüba nungi kümzüker.

⁵Tia makar temeshiba jagi pa lenmang metonga yanglutsü; saka tamajungerji pei temenen nung tsüktsü.

⁶Tindanger temeshiba jagi parnok kümzüktsü, saka ashikülakertemji parnok pei meyong temenen nung putettsü.

⁷Kodang tamajunger ka asür, pa teimla samar; aser Tsüngrem metsübur teimlabaji kecha makümer.

⁸Temeshibai timtem nungi kümzüker, saka tamajunger aji agiang air.

⁹Tsüngrem metsübuba nisungi pei bang agi pei kiyonger raksatsür; saka shisatsü ajanga temeshipurji kümzüker.

¹⁰Temeshipur azükaru dang yimti nungji pelateper; aser temenenpur samadang tepela ayimtenba lir.

¹¹Tindanger temoatsü agi yimtiji ajungketer; saka tamajunger tebang agi aji atsüngdoker.

¹²Shibai pei kiyonger ilatsür pa shisatsü agi anünga lir; saka tangatetba nisungi ola madoki alir.

¹³O belener ka ama senzüri miim o pokbatsür; saka temulung lemtetba tanela kati mapaji miimbanga yutsür.

¹⁴Shisa taka leniba malidak nübur laor, saka kibok tesayuba bulua alidak tekümzük lir.

¹⁵Aener terozüker kaji kanga amsatsü; saka terozükba semparji kümzüka alitsü.

¹⁶Taochi tetsüri tetushi angur, aser meranga inyaker nisungtemi rongsen angur.

¹⁷Yimlibilemba nisungi ajangzüker; saka maochiba nisungi pei sasa okronger.

¹⁸Tamajungeri temenen taa angur; saka temeshiba prokeri chichiba sempet angur.

¹⁹Temeshiba nung akanga aliri taküm angutsü; saka temenen arishirji asütsü.

²⁰Temulung nung mashikoshia alirtemji KIBUBA tsüngdang tesempatsü; saka pei lenmang nung tabensartemji pa tepelatsü.

²¹Ya metetang, temenen nisungji memerenshi-i malitsü; saka temeshipur metsüji kümzüktsü.

²²Ak teni tebang nung hon küri ama, teshisadangba makaba tobur tajung aiürji lir.

²³Temeshipur aginübaji tajung dang; saka tamajunger teimlabaji rasarabongba;

²⁴Nisung kati mokurui agütsür, saka tali akar; tangar kati pai tagütsütsü tim sota ayur, saka tanüng dang tendaktsür.

²⁵Tejungnüba takümji kaa kümdaktsütsü; shibai tzü ainer pa daka tzü indaktsütsü.

²⁶Shibai tsük anüngtener, nüburtemi pa atakatemtsü; saka shibai ayoker pa tekolak manung temoatsü alitsü.

²⁷Tajung nendaka bushiri maongka bushir; saka shibai temenen bushir aji pa dangi arutsü.

²⁸Shibai pei rongsen dak temulung lemdir pa tsüktsü; saka temeshipur süngo tekümdang ama azükarutsü.

²⁹Shibai pei kibong timtemdaktsür pai mopung senmang amangtsü; aser tamashirji tashitemeteter kilir asütsü.

³⁰Temeshipur tejangji taküm süngdong; saka tashitemetet akasangi tanela anir arur.

³¹ Ajiang, temeshipur nemji alima nung taa agütsüra; tamajunger aser temenen nisung asoshi koda tali asütsü?