Read njo APIJEMTSÜ SHIN 12 Bible Online

APIJEMTSÜ SHIN 12 - njo bible

APIJEMTSÜ SHIN 12

¹Shibaisa temetongshiba meimer pai shisatsü meimer, saka tarütsüba semparji tamachi.

²Nisung tajungi KIBUBA maongka angur; saka temenen tasa abener nisung pai aitsür.

³Tamajung agi nisung ka meyanger; saka temeshipur teraji marakzütsü.

⁴Kinungtsü tajung kaji pei kinungpu chuba korang; saka maksüdaktsülaji kinungpu teret nung tap ama lir.

⁵Temeshipur tebilembaji ochi; saka tamajunger kibok sayubaji külakkübongba.

⁶Tamajunger otemji azü tokshitsü mitba, saka tindanger tebangi parnok kümzüktsü.

⁷Temenenpurji atsüngtoker aser meli-i akümer; saka temeshipur kibongji noktaktsü.

⁸Pei shisatsü yari nisung ka asangtsü, saka mashikoshi mulung adenerji sempatsü.

⁹Tulur ka ama sayur chiyungtsü makaba dang nungi, pei asoshi inyakba tilar kaji tajungba.

¹⁰Temeshi nisungi pei shiruru taküm anebalur; saka tamajunger dak aria bilembaji mali.

¹¹Shibai pei lu ayimer pa chiyungtsü peria akatsü; saka shibai amajok mapa sülen anishir, pa tangatetba nung anünga lir.

¹²Temenenpuri temenen nisungtemi rakzükbaji aginür, saka temeshipur tera jagi tejang tangtsür.

¹³Pei tebangi ozüng raksaba nung temenen nisung apur, saka temeshipur timtem nungi jentettsü.

¹⁴Pei otem nungi nisung ka tajung agi tipatemtsü. Aser nisung kati züsenbaji pa nem agütsütsü.

¹⁵Tamashir ka lenmangji pei nükdang shitak lir; saka shisa akari tesayuba dang angar.

¹⁶Tamashiri yakta ain adoker, saka tekümdang nisungi tatalaba mezüngshir.

¹⁷Ochi jembisang jagi kuli shitak agütsür; saka tiyazü kuli kati, külakkübongba jembir.

¹⁸Noklangnok agi settoktsüba ama mashibangi jembiba otemji lir; saka shisa takar temeli ajanga tanebtsü bena arur.

¹⁹Ochiba tebangji teti asoshi tenteta lir, saka tiyazü temeliji khen asoshi dang.

²⁰Shiri temenen tasa asar parnok mulung nung külakkübongba lir; saka shiri tajung asar parnok den tepela lir.

²¹Temeshipur dangi kecha majungmazü madoktsü, saka tamajunger timtem agi sünga alitsü.

²²Tiyazü tebang KIBUBA tsüngdang tesempatsü; saka ochishia inyakertemji pa pelatsü.

²³Tekümdang nisungi pei shisatsü miimbanger; saka tamashir mulungi parnok tamashiba sangdonger.

²⁴Tenendak teka agi ozüng amtsü, saka azümesenertem kangshia inyakdaktsütsü.

²⁵Temulung nung shisa bulu agi nisung ka mechioka ludaktsür; saka o tajungi aji peladaktsür.

²⁶Temeshipurji pei kiyonger leniba; saka tamajunger lenmangi parnok aibelendaktsür.

²⁷Azümesen nisungi kecha mangutsü, saka senti rongsenji tenendakba pur meyong.

²⁸Temeshiba lenmang nung taküm lir; saka tai lenmangi tasüleni anir.