Read njo APIJEMTSÜ SHIN 13 Bible Online

APIJEMTSÜ SHIN 13 - njo bible

APIJEMTSÜ SHIN 13

¹Shisa taka jabasoi pei tebui sayuba angar; saka sensamasari tarütsüba mangar.

²Nisung tajungi pei bang nungi tejang tajung achitsü; saka külakkübongeri mapa tamajung inyaker.

³Shibai pei bang mitdir pai pei taküm soter; saka shibai pei bang ulua lapoker, pai tesama angur.

⁴Azümesen takümi jenti aginür aser kecha makar; saka tenendakba takümji peria kümdaktsütsü.

⁵Temeshi nisungi tiyazü sempar, saka tamajungeri maksü adokdaktsür aser tarütsüba bena arur.

⁶Tindangerji pa lenmang nung temeshibai miter, saka temeneni tamajungertemji atsüngdoker.

⁷Nisung kati kecha makai yur pei sasa takar akümer; tangar kati rongsen tulu yur pei sasa sensaker küma sayur.

⁸Nisung ka taküm alangzükbaji pa rongsen; saka sensaker talangzükba kecha maka.

⁹Temeshipur sangwa jagi pelateper; saka tamajunger milenji remseptsü.

¹⁰Asüküm agi rarabangsen dang adokdaktsür, saka tesayuba agizükertem den tashitemetet lir.

¹¹Ajongben anguba rongsenji ajema akümtsü; saka züsenba agi terara shibai bendendir, pa züintsü.

¹²Kodang teimla raksar, temulung shirangdaktsür; saka taginüba atongbaji taküm süngdong.

¹³Shibaisa oji sempar pei sasa dangi tesamatsü bena arur; saka shibai ozüng tsübur pa nem sempet agütsütsü.

¹⁴Tashitemetet tesayubaji taküm tzüpokdak. Iba jagi tasüba sang nungi pilatsü akok.

¹⁵Tajung angatetba jagi maongka angur; saka ozüng raksar lenmangji teraksatsüba.

¹⁶Tekümdang nisung shiai shisatsü agi inyaker; saka tamashiri pei tamashiba ayimsünga proker.

¹⁷Temenen osang abeneri nisung timtem nung tsükdaktsür; saka tamangtsü o tongtari tanebtsü bena arur.

¹⁸Temetongshiba magizüker tsütaji sensak tia aser maksü; saka tarütsüba nung temulung atangerji tushitsü.

¹⁹Taginütsü atalokba atabaji taküm asoshi tajung lir; saka tamashirtem asoshi temenen nungi pilatsüji tesempatsü lir.

²⁰Shisa akar den shibai jajar pa shisa kaa akümer; saka tamashirtem den medemerji timtem angutsü.

²¹Tia makai temenenpurji arishir; saka temeshipur nem azükaru lemzüktsür.

²²Nisung tajungi pei semchisemnur nem senmangtsü toktsür, saka temenenpur rongsenji temeshipur asoshi rizünger.

²³Sensakeri züsenba ali nungi chiyungtsü jenti adokdaktsür; saka ochi mashiba ajanga aji bener oadoker.

²⁴Shibai pei artsüng sota ayur pai pei jabaso sempar; saka shibai pa meimer pai pa nendaka arütsür.

²⁵Temeshipur pei chinütsü jangratema achitsü peria lir; saka tamajunger tepok masünger.