Read njo APIJEMTSÜ SHIN 14 Bible Online

APIJEMTSÜ SHIN 14 - njo bible

APIJEMTSÜ SHIN 14

¹Shisa taka tetsür shiai pei ki yanger; saka tamashiri aji la keti raksar.

²Indang indanga shibai jajar pai KIBUBA tsübur; saka pei lenmang nung mashikoshiri pa sempar.

³Tamashir tebang nung pa asüküm asoshi artsüng lir; saka tashir tebangi parnok sottsü.

⁴Nashi pungchi malidak chiyungtsü agi anünga lir, saka nashi pungchi tashi agi tsük jenti züiner.

⁵Tamangtsü kuli kati meyazütsü; saka tiyazü kuli kati tiyazü jembir.

⁶Sensamasari amajok nung shisatsü bushir, saka tangateter tsüngdang temetetba shisatsüji temela lir.

⁷Tamashir ka tsüngdang nungi pila-a liang, kechiaser nai pa dang nungi shisatsü o mangutsü,

⁸Tekümdanger shisatsüji lenmang angatettsüba lir; saka tamashir tamashibaji külakkübong lir.

⁹Tamajunger Tsüngremi sensamasatsür; saka tindangeri pa maongka angur.

¹⁰Temulungjangi pei takubaji metet; aser aeneri iba tepelaji melemsateper.

¹¹Tamajunger kiji atsüngtoktsü; saka tindanger kiji azükarutsü.

¹² Nisung tsüngdang shitak mesükba lenmang ka lir; saka iba tatembangji tasüba lenmang.

¹³Lemtamenütep nunga temulungjangji jashiseta lir; aser tepela tatembangji tejashi lir.

¹⁴Mashikoshirji pei aolen süngjang agi nenettsü, aser nisung tajungerji pa mapa süngjang agi asüngtsü.

¹⁵Tongmelangeri o ajak amanger; saka tekümdangeri pei aolen reprangshiranger.

¹⁶Shisa akari kümdanger, aser temenen nungi pilar; saka tamashiri pei sasa dak tashishitsü ketdaktsür, aser mekümdanger.

¹⁷Yakta rasari mashimalu inyaktsü; saka teshisadangba nisungi tatasa akar.

¹⁸Tongmelangeri tamashiba senmang amanger; saka tekümdangerji shisatsü agi korang semtsür.

¹⁹Tamajunger tajunger tsüngdang, aser temenenpur temeshipur tsüngdang apudaker.

²⁰Sensaker pei kiyongeria sempar; saka takar tembar aika lir.

²¹Shibai pei kiyonger sempar pai temenen menar, saka shibai sensaker dang aria bilemer pa tepelatsü.

²²Temenen tasa asar jagi aibelen masür no? Saka tajung tasa asartem tsütaji yimlibilem aser tamang katetba.

²³Züsenba ajak nung tajangzük lir, saka tebangi jembiba agidangbo anüng apung dang tendaktsür.

²⁴Tashir korangji parnok tashitemetet; saka tamashirtem narozükji tamashiba dang lir.

²⁵Ochiba kuli agi takümtem kümzüker; saka shibai tiyazü jembir pa tashioktsür.

²⁶KIBUBA tsübuba nung temulung alemtsü tulu lir; aser par chirnur jenokdak akatsü.

²⁷KIBUBA tsübubaji taküm tzüpokdak. Yamala jagi tasüba sang nungi pilatsü akok.

²⁸Nübur telok rongnungji chuba sentsüwangshi lir; saka nübur melira chubaji tiyazü.

²⁹Ain-abong nung mekararji tangatetba tulu; saka jakla tejokjokeri tamashiba tudaktsür.

³⁰Tesüngjem temulung agi shi nung taküm agütsür; saka tenükmerem jagi teret tap kümdaktsür.

³¹Shibai sensaker rishikangshir pei Teyanglur atalar; saka tenüngdaktsü pur dang yimlibilem akari pa tushir.

³²Tamajungerji pei menen yong mindoker; saka temeshipur pa tsübuba nung jenokdak lir.

³³Tangatetba akar mulung nung tashitemetet amunger; saka tamashirtem mulungsentsü nung alibaji metetadoker.

³⁴Temeshibai kin ka ajungkettsür, saka kechi kin südir süaka temenenji taktsü ka lir.

³⁵Chuba maongkaji shisa kaa inyaker kilir ka tsütsü lir, saka maksü inyaker anemaji pa terasaba alitsü.