Read njo APIJEMTSÜ SHIN 15 Bible Online

APIJEMTSÜ SHIN 15 - njo bible

APIJEMTSÜ SHIN 15

¹Tanemi langzüba agi mit sünepdaktsür; saka o tesashi agi ain adokdaktsür.

²Tashir temeli-i shisatsü shitak benshir; saka tamashirtem tebangi tamashi tokzüker.

³KIBUBA tenükji tajunger aser tamajunger madak ajaklen mita lir.

⁴Ajemalu temeliji taküm süngdong; saka idakji mashikoshi atenba nung tanela raksatsüba keta lir.

⁵Tamashiri pei tebui metongshiba sempar; saka shibai tarütsüba angar pa tekümdang.

⁶Temeshipur kidangji rongsen jenti lir; saka tamajunger tajangzük aruba nungji timtem lir.

⁷Shisa kar tebangi shisatsü proker; saka tamashir tebilemba agi yamaji meinyaker.

⁸Tamajungeri tenlabaji KIBUBA tsüngdang tesempatsü; saka tindanger sarasademji pa tsüngdang tepelatsü.

⁹Tamajunger lenmangji KIBUBA tsüngdang tesempatsü, saka temeshiba sülen anitakerji pai meimer.

¹⁰Shibai pei lenmang toktsür, pa asoshi kanga tarütsüba lir; shibai tarütsüba sempar pa asütsü.

¹¹Sheol aser Abaddonji KIBUBA tsüngdang lapoka lir. Ajangla kodaka nisung chirtem mulung pa tsüngdang lapoka alitsü?

¹²Sensamasari marütsüdaktsünür; pai shisa kar dangi maotsü.

¹³Tepela mulungjangi tejak tesangwa tendaktsür; saka temulungjang tejashi agi tanelaji zürepdaktsür.

¹⁴Tangatetba mulungjang adeneri shisatsü bushir; saka tamashirtem tebangi tamashiba nung mesür.

¹⁵Timtemer asoshi anogo ajakji majung; saka tepela mulungjang adenerji maneni benjong akar.

¹⁶Timtem aketba rongsen tulu akaba dang nungi, KIBUBA tsübuba den tera akaba tajungba.

¹⁷Tejebketba nashi pungchi aser tesempatep alidak chiyungdangbo, temeim alidak süngolemba den chiyung tajungba.

¹⁸Mit aketba nisungi rarabangsen adokdaktsür; saka ain adoktsü nung mekarar-i rarabangsen süngjemdaktsür.

¹⁹Azümesener lenmangji ai agi sünga lir; saka tindanger lenmangji lentongbang akümer.

²⁰Shisa taka jabasoi tebu peladaktsür; saka tamashi nisungi pei tetsü sempar.

²¹Shisa makar tsüngdang tamachibaji tepelatsü; saka tangatetba nisungi pa aolenji shitak jajar.

²²Kibok sayuba makara nükjidongtem mataloker; saka shisa tajung agütsür aliba agi item ataloker.

²³Peta langzüba nung nisungi pelar; aser mapang tesütep nung o ka, aji koda tajung!

²⁴Tekübok Sheol nungi pilatsüsa shisa akar lenmangji, temaleni atuba taküm lenmang lir.

²⁵KIBUBAi asükümer kibongji samatsür; saka amitsür arrtsüji pai anüker.

²⁶Tamajunger tasatem KIBUBA tsüngdang tesempatsü lir; saka temeshipuri jangratemtsü o jembir.

²⁷Tiyazü tajangzük asoshi merumerui pei kibong timtemdaktsür; saka shibai süpokrem sempadir pa taküm alitsü.

²⁸Temeshipur temulungjangi koda langzüktsü aji bushir; saka temenenpur tebangi temenen oset tokzüker.

²⁹Tamajunger nungi KIBUBA talangka pila-a lir, saka pai temeshipuri sarasadembaji angashir.

³⁰Tenük tesangwa jagi temulung peladaktsür; aser osang tajungi terettem tashi itdaktsür.

³¹Shiba tenarongi tarütsüba tajung dang angadir, pa tashir rongnung alitsü.

³²Shibai temetongshiba magizüker, pai pei tanela sempar, saka shibai tarütsüba dang angar pai tangatetba ajangzüker.

³³KIBUBA tsübubaji tashitemetet tesayuba, aser khonang dang tama ajemalu lir.