Read njo APIJEMTSÜ SHIN 16 Bible Online

APIJEMTSÜ SHIN 16 - njo bible

APIJEMTSÜ SHIN 16

¹Temulungjang terenemba nisung meyong; saka temeli-i langzübaji KIBUBA nungi.

²Nisung lenmang ajak pei nükdang temerük lir; saka KIBUBAi tanela odanger.

³Ne mapa KIBUBA nem nunglokjang, sürabang ne terenemba ataloka atatsü.

⁴KIBUBAi kechisarena nükjidong ka yur yanglu. Hau, temenenpura timtem anogo asoshi yanglu.

⁵Mezümekümer shia KIBUBA tsüngdang tesempatsü. Atangji pa memerenshi-i malitsü.

⁶Yimlibilem aser temulung lemtetba agi temenen pungiogo; aser KIBUBA tsübuba agi nisungi temenen nungi pilar.

⁷Kodang nisung lenmangtemi KIBUBA peladaktsür, pai par tsükchirtem pa den yimjung nung yutsür.

⁸Temeshiba den ishikaji, ochi mashiba den tajangzük tulu dang nungi tajungba.

⁹Nisung mulungjangi pa lenmang tasa asar; saka KIBUBAi pa meratem anishir.

¹⁰Temeshi obendangba nung temenen memenar. Pa tebangi obendangba nung temenen memenar.

¹¹Ochi seret aser touzükba KIBUBA meyong. Juli nung toudangba lung ajak pa mapa.

¹²Chubatem tai menabaji tesempatsü; kechiyong chuba mendenji temeshiba agi küma lir.

¹³Temeshi tebangtem chuba tsüngdang tepelatsü; aser shitak jembir dang pai meimer.

¹⁴Chuba terasabaji tasüba osangbenertem ama; saka shisa taka nisungi aji süngjemdaktsütsü.

¹⁵Chubar jakyim nung taküm lir; aser pa maongkaji tsükla tzüngluruwa mepet mesük.

¹⁶Shisatsü aser tashitemetet angutsü hon dang nungi koda tajungba! Hau, taribi dang nungi tangatetba-ang shimtsüla.

¹⁷Tindanger lenkongji temenen nungi pilatsüba lir. Pei lenmang nung temulung agütsüri pei taküm soter.

¹⁸Asüküm agi teraksa adokdaktsür, aser ngasangatem agi ludaktsür.

¹⁹Asükümer den terakzükba lemsadang nungi, sensaker den ajemalutsü tajungba.

²⁰Shibai o nung temulung agütsür pa azükarutsü, aser shibai KIBUBA dak temulung lemdir, pa tepelatsü.

²¹Temulung nung shisa takar dang shitak meteter ta ajatsü; aser tebang tanangi temesüzükba züindaktsür.

²²Shiba tangatetba aka, pa asoshi aji taküm tzüpokdak; saka tamachitem metongshibaji parnok tamashi lir.

²³Shisa takar temulungjangi pei bang dang sayur, aser pei bang nung temesüba bendenloker.

²⁴Jangratemtsü o ninang mojitzü tejep mesük. Tanela asoshi tanang aser temang asoshi anema yutsüba.

²⁵ Nisung tsüngdang shitak mesükba lenmang ka lir, saka iba tatembangji tasüba lenmang.

²⁶Teinyak nisung ayaba jagi pa asoshi inyaktsür; kechiyong pa tebangi pa dang akhanger.

²⁷Tagidak makaba nisungi tamajung tasa asar; aser pa tebang nung tarongba mi amato lir.

²⁸Mashikoshi nisungi rarabangsen ayimdaker proker; aser miim o jembiri akang tembar piladaktsür.

²⁹Tetoktak nisungi pei kiyonger mesüzüker, aser majungba lenmang kati pa anir.

³⁰Shibai tenük atsüker pai tamajung asar. Shibai tebang mejembanger, pai tamajung adokdaktsür.

³¹Kupu apuba kolakji sentsüwangshi korang. Aji temeshiba taküm ajanga ajangzüker.

³²Ain adok nung mekarabaji temeranger dang nungi tajungba; aser shibai pei taküm azüoker, yimti ka agir dang nungi taoba.

³³Tiaji tepi ma nung yutsür, saka iba lemtettsübaji KIBUBA nungi.