Read njo APIJEMTSÜ SHIN 17 Bible Online

APIJEMTSÜ SHIN 17 - njo bible

APIJEMTSÜ SHIN 17

¹Ki ka nung rarabangsen agi sünga benjong aliba dang nungi, chiyungtsü takong ka den tesüngjem tajungba.

²Maksü benshiba jabaso madak shisa kaa benshiba alar kati yimsü asütsü, aser adianu rongnung senmang shilem atatsü.

³Senzükba poji taribi asoshi, aser misembongji hon asoshi; saka KIBUBAi temulungjang tentanger.

⁴Tamajung inyakeri temenen tebanglen temulung agütsür; aser tiyazüri tai temeli tsütsü tenarong agütsür.

⁵Shibaisa sensaker dang tiludir, pai pei Teyanglur sensamasar; aser lendong madak pelarji memerenshi-i malitsü.

⁶Semchisemnurji tamburtem korang; aser chirnur sentsüwangshiji parnok tsüraburtem.

⁷O tajung suwar atema masü; talisa tiyazü jembiba chuba meyong masü.

⁸Tagütsür asoshi süpokremji tepuatsü lung. Kolenisa pai meyipdir pai azükarudaktsür.

⁹Shibaisa ozüng raksaba dang tai tokdir; pai temeim bushir, saka shibai leplalepshia mapa ka tushidir pai akang tembartem piladaktsür.

¹⁰Suwar dak noklangben azükba dang nungi, tangatetba nisung dak tarütsübai tali aroka taiba.

¹¹Tamajung nisungi anema inyaktsü dang bushir; anungji maochiba osang bener pa anema yoktsü.

¹²Tamashir ka pa tamashiba nung ajuru dang nungi, pei chanu rakzükba shirem katiang nisung ka ajurudakjang.

¹³Shibaisa tajung melena tamajung agütsüdir, par kibong nungi tamajung mepilatsü.

¹⁴Rarabangsen tetenzükji tzü moteta adokdaktsüba ama lir. Anungji rarabangsen metenzükdang aji anenadokang.

¹⁵Temenenpur shibai metentsür, aser shibai temeshipur aitsür, anaprongji saku KIBUBA tsüngdang tesempatsü.

¹⁶Tangatetba mali sürnung, kechiba tamashir ket nungi shisatsü alitsü?

¹⁷Tembari mapang ajak nung meimer, aser adianu ka tetsükchiteptsü asor.

¹⁸Tangatetba nung anüngeri tenangzükba agütsür, aser pa kiyonger tsüngdang terozüker akümer.

¹⁹Rarabangsen meimeri ozüng raksaba meimer. Shibai kishi kanga ajungketer pai teraksaba bushir.

²⁰Tekirak temulung adener nisung azükaru masür; aser shiba dak mashikoshi temeli aten pa lendong nung tsüker.

²¹Tamachi jabasoji pei tebu asoshi tejashitsü; aser tamashir tebuji tepela malir.

²²Tepela mulungjangji mozü tajung; saka tanela teraksa jagi teret kongdaktsür.

²³Ochiba lenmang meyipdakja, temenen nisungi süpokrem agizüker.

²⁴Tangatet nisungi tashitemetet tsütsü tejak ashir, saka tamashir tenükji alima tatembanglen lir.

²⁵Tamashi jabasoji tebu amsaba; aser la asola atema taku.

²⁶Ano temeshipur merenshitsü, mesüra tendangba asoshi tamarener dak azükbaji majung.

²⁷Temeteteri pei o soter. Tesüngjem mulungsen adenerji tangateter nisung.

²⁸Tamashir kata, pa ola madokdang shisa taka ta züngshir. Kodang pei tebang shibangdir, pa tekolok atener nisung ama züngshir.