Read njo APIJEMTSÜ SHIN 18 Bible Online

APIJEMTSÜ SHIN 18 - njo bible

APIJEMTSÜ SHIN 18

¹Shibai pei sasa pila-a linür, pai pei sünütsü bushir. Pai ochi obendangba ajak anema tai kuli bushir.

²Tamashiri tangatettsü jangra-a mali, saka pei tebilemba dang jembitsü jangrar.

³Temenenpur den sensamasaba arur, aser maksü mapa den maksü arur.

⁴Nisung tebang otem tzü tarok ama; tashitemetet tzüpokdakji tayimba ayongnu ama.

⁵Tamajungpur dang tejak reprangba, mesüra temeshipur ka dang ochi obendang sota ayubaji tim masü.

⁶Tamashir tebang rarabangsen nung adener, aser pa tebangi tazükba jaoker.

⁷Tamashir tebang pei raksatsüba, aser tebangmechi pei taküm asoshi sang.

⁸Miim o jembir otemji bangnem tajung mesük, aser parnokji poknüng leni air.

⁹Pei mapa nung anüalemerji, teraksa den adianu.

¹⁰KIBUBA tenüngji tashi tait mitsa; temeshipur ajagi asüma air aser kümzüka alir.

¹¹Takar rongsenji par tashi tait yimti, aser pa pei nükla dang jara talang mesük.

¹²Teraksaba dang tama nisung mulungjang ngasangatem lir; saka tetushiba dang tama ajemalu lir.

¹³Shibai mangadangi telangzüba agütsür, aji pa asoshi maksü aser tamashiba.

¹⁴Nisung tanelai pei lemtetba tizüktsü, saka teraksa tanelaji shibai aremzüktet?

¹⁵Tekolok atenba mulungjangi shisatsü angur; aser shisa takar tenarongi shisatsü bushir.

¹⁶Nisung sempeti pa asoshi talidak kadaktsür, aser tulur nisungtem tsüngdangi anir arur.

¹⁷Shibai pei indang jembir tamasabo shitak amato lir; saka par kiyonger arur aser pa putetdaktsür.

¹⁸An tokdangba agi rarabangsen anendaktsür, aser tashi tait temeranger tsüngda nung lemtettsür.

¹⁹Adianu ka yarira, paji tashi tait yimti ka ama, saka bangsentepbaji mitsa tartangtsü ama.

²⁰Nisung tepok pei tebang süngjang agi asüngtsü. Pa tebang züinba jagi pa tip atemtsü.

²¹Temeli tashi nung tasüba mesüra taküm keta lir; aser shiri ibai meimer pai iba tejang achitsü.

²²Shibaisa kibutsü bushitetdir pai oset tajung ka bushiteter, aser KIBUBA maongka angur.

²³Sensakeri temepishiba amshir; saka takari mashibangi langzür.

²⁴Shibai tembar aika yimteter pai pa raksaba adokdaktsür; saka tembar karbo adianu dang nungia tenendakba lir.