Read njo APIJEMTSÜ SHIN 19 Bible Online

APIJEMTSÜ SHIN 19 - njo bible

APIJEMTSÜ SHIN 19

¹Pei bang mashikoshi aser tamashir dang nungi, sensakeri shitak nung jajarji tajungba.

²Shisatsü makai alitsüji nisung ka asoshi majung; aser pei tsüng karari pei lenmang aibelener.

³Nisung tamashibai pei lenmang raksadang, pa mulungjangi KIBUBA anema tilur.

⁴Rongseni tembar aika akümer, saka sensakerji pei tembar nungi pilar.

⁵Tiyazü kuli memerenshi-i malitsü; aser tiyazü jembirji mejenbutsü.

⁶Aikati tamarener maongka bushir, aser nisung ajakji sempet agütsür tembar lir.

⁷Sensakerji pei adianuia sempara, pa dang nungi langa pilar tembartemi balaka koda tali sempatsü! Pai parnok bushir, saka parnok oadoker alir.

⁸Shisatsü anguri pei taküm meimer; tangatetba akari azükarutsü.

⁹Tiyazü kuli memerenshi-i malitsü; aser tiyazü jembirji samatsü.

¹⁰Tamashir asoshi tesadok takümji mesütep. Ano talisa alar kati tamarener madak mechubatet.

¹¹Nisung teshisadangbai pa terasaba nung mekaradaktsür, aser tai ka koda toktsübaji pa sentsüwangshi.

¹²Chuba terasabaji arüa aliba molusongzü ama; saka pa maongkaji rem manung azüngtsü mesük.

¹³Tamashi jabaso pa tebu asoshi timtem; aser kibutsü rarabangsenji tanen maka tzünglu.

¹⁴Ki aser rongsen tebutem nungi senmang; saka tekümdang kibutsü KIBUBA nungi.

¹⁵Azümesenbai ayipjanga mejangdaktsür; aser azümesen taküm ayatsü.

¹⁶Ozüng benshiri pei taküm soter. Shibai oji mesenmetur pa asütsü.

¹⁷Shibai sensaker dang aria bilemer, pai KIBUBA nem aputsür, aser pa mapa tajung asoshi pa nem pai shia agütsütsü.

¹⁸Teimla alidangji, ne jabaso metongshiang; saka pa samatsütsü nai tebushi.

¹⁹Kanga rasarabongeri temerenshi angutsü; Nai pa kümzüktetra, aji ano tanaben nai inyaktsü tim.

²⁰Tesayuba angang, aser temetongshiba agizükang. Anungji tarutsü nung na shisakar alitsü.

²¹Nisung mulungjang nung tasa jenti lir; saka KIBUBA nükjidongji amung tema alitsü.

²²Nisung dak taginütsüji pa yimlibilem. Tiyazü jembidang nungibo sensakba tajungba.

²³KIBUBA tsübuba jagi taküm leni anir; aser shiba aji aka, tiptema alitsü. Tamajungeri pa mesemdangtsü.

²⁴Azümeseneri pei ket ausu nung amuoker, aser aji tanaben pei bang lenia majungketettsü.

²⁵Sensamasar dakji zükang aser tongmelanger jagi tekümdang angazüktsü. Tangateterji arüjang, aser shisatsü angazüktsü.

²⁶Shibai tebu dang rasadir, aser tetsü aridokdir, iba jabaso jagi maksü adokdaktsür, aser maksü bena arur.

²⁷Kü jabaso, shisatsü otem nungi, pilatsü sayuba nungi anenang.

²⁸Kecha malangba kuli-i ochiba sensamasar; aser temenen tebangi temenen meyoker?

²⁹Sensamasar atema obendangba, aser tamashir rongdong asoshi tazükba renema lir.