Read njo APIJEMTSÜ SHIN 2 Bible Online

APIJEMTSÜ SHIN 2 - njo bible

APIJEMTSÜ SHIN 2

¹Kü chir tashitemetet len ne tenarong tendakja, aser kü temelaba len ne mulung tena,

²nai kü otem agizükra aser kü ozüngtem nendaka rizüngra;

³Hau, nai tangatetba asoshi ayimtenra, aser tangatetba asoshi nai ola adokra;

⁴nai la taribi ama bushira, aser miima aliba rongsen ama la bushira;

⁵idangji nai KIBUBA tsübubaji angatettsü, aser Tsüngrem shisatsüji bushitettsü.

⁶Kechiaser KIBUBAi tashitemetet agütsür. Pa tebang nungi shisatsü aser tangatetba adoker.

⁷Tindanger asoshi pai tetangshi shisatsü rizünga yutsür. Shitakba nung jajartem asoshi pa jong;

⁸ochishir lenmangtem pai anüker, aser pa temeshipur lenmangji pai wazüka ayur.

⁹Idangji nai temeshiba aser ochiba aser tindangba aser lenmang tajung ajak angazüktsü.

¹⁰Kechiyong tashitemetet temulungjangi aitsü, aser shisatsü ne nela asoshi jangratemtsüka alitsü.

¹¹Teshisadangbai ne madak mittsü; tangatetbai na anüktsü.

¹²Tamajungba lenmang nungi, mashikoshi jembir nisungtem nungi na kümzüktsü;

¹³Shirnoki tammang lenmangtem nung jajatsü asoshi, tindangba lenmang senzüka toktsür;

¹⁴shiri tamajung inyaktsü pelar, aser tamajunger mashikoshiba nung jangrar;

¹⁵shirnok par lenmang nung tekirak, aser parnok lenmang nung pei mulung kanüba lir, parnok nungi kümzüktsü.

¹⁶Samesa tetsür, bendangtsür shibai pei o tanep jembir, la nungi na kümzüktsü.

¹⁷Shiri pei lanuwa medemer toktsür, aser Tsüngrem tsüngdang tezüngzüktepba amar;

¹⁸kechiyong lar ki tasüba len, aser la lenmangtem tasü akhüm len shia lir.

¹⁹La dangi aoba shinga meshilanger, mesüra taküm lenmangtem parnoki meyipa mangur.

²⁰Anungji nai nisung tajung lenmang nung jajang, aser temeshipur lenmang nung liang.

²¹Kechiyong tindangeri linük nungji alitsü, aser tai makartem iba nungji alitsü.

²²Saka tamajunger linük nungjagi leptoktsü, aser ashikülaker tera nungi atsüdoktsü.