Read njo APIJEMTSÜ SHIN 20 Bible Online

APIJEMTSÜ SHIN 20 - njo bible

APIJEMTSÜ SHIN 20

¹Yi sensamasadaktsüba, aser temesepba yi rongrongdaktsüba lir. Aser iba nung shibaisa aibelendir shisatsü maka.

²Chuba dak tetsübutsü mitji molusongzü arrürba ama lir; shibai pa rasadaktsürdir, pai pei taküm anema temenen menar.

³Rarabangsen nungi pila-a alitsüji nisung ka atema tetushi lir; saka tamashir shiai yakta rarabangsena alitsü.

⁴Metsü mapang azümeseneri alu malatsü. Aluruwa arudang pa kecha makatsü.

⁵Nisung mulungjang nükjidongji tzü tarok ama lir; saka tangatetba nisungi aji agitettsü.

⁶Nisung timbai pei yimlibilem indang sangdongtsü; saka temulung lemtetba nisung shibai bushitet?

⁷Temeshi nisung shibai tai makai jajar, pa sülen par chirji tepelatsü.

⁸Obendangdak amenba chubai, pei tenük agi tamajung ajak bushiteter.

⁹“Ni kü mulungjang merüka yanglushiogo; temenen nungi ni merükteta lir” ta shibai shitet?

¹⁰Touzükba balala aser tatakzükba balala, anaprongji saku KIBUBA tsüngdang tesempatsü.

¹¹Pei mapa merük asü masü aser aji tim asü masü, tanur katia pei sasa pei mapa agi metetdaktsür.

¹²Tangashiba tenarong aser tanguba tenük, anaprongji KIBUBAi yanglu.

¹³Mejangtsü tejangra, mesüra na sensak tiai aitsü. Nü tenük lapokang, aser ne chiyungtsü talubosa angutsü.

¹⁴Talisang jagi ashir, “Ya majung; ya majung!” Saka pa lenmangi pilar külen pai mezümekümer.

¹⁵Hon aser sentilung jenti lir; saka shisa akaba tebangji aika alangba sentilung.

¹⁶Bendanger atema terozüker meyong süoshiji agiang; aser bendanger atema terozükerji tezüngzükbai idakjang.

¹⁷Külakkübong agi bena aruba chiyungtsü nisung tsüngdang tanang; saka tesülen pa tebang lungsang agi asüngtsü.

¹⁸Tasa ajak kibok tesayuba agi asazüker; aser shisa taka leniba agi tongbang rarar.

¹⁹O benshir ama senzür jagi miim otem pokpatsür. Anungji tebang tulu akar denji temedem.

²⁰Shibaisa pei tebu aser tetsü atakatemdir, kanga tammangdak pa milen aseptsü.

²¹Tetenzük nung aritepa senmang angutsü akok; saka tatembang nung memoatsü.

²²“Ni tamajung shia agütsütsü” ta nai teshi; KIBUBA ata-ang, aser pai na yaritsü.

²³Touzükba balakaji KIBUBA tsüngdang tesempatsü; aser tekülak seretji majung.

²⁴Nisung senzüsembongbaji KIBUBA nungi; sürabang koda sür nisungi pa lenmang angatettsü akok?

²⁵“Ya temeshi lir”, ta aritepa ashitsü, aser azüngashiba sülen ashishiteptsüji nisung atema sang.

²⁶Shisa taka chubai temenenpur sendoktsür, aser monetba talungtsüji parnok madak lungdaktsür.

²⁷Nisung tanelaji KIBUBA milen, Pa telunglen ajaklen bushir.

²⁸Yimlibilem aser tamang katetba agi chuba kümzüker, aser pa chuba menden yimlibilem agi soter.

²⁹Asangur tashiji parnok sentsüwangshi; saka kupu kolakji tambur tobur ajung.

³⁰Tazükba zübu jagi tamajung meshitettsür; aser tazükbai telunglen ajak merüktettsür.