Read njo APIJEMTSÜ SHIN 21 Bible Online

APIJEMTSÜ SHIN 21 - njo bible

APIJEMTSÜ SHIN 21

¹Chuba mulungjangji ayongnu tzü ama, KIBUBA ket nung lir; pai koleni mulung, ilen jagi aji meyipdaktsür.

²Nisunger lenmang shiaji pei nükdangbo shitak lir, saka KIBUBAi temulung odanger.

³Tenlaba dang nungi temeshiba aser ochiba inyaktsü, KIBUBA tsüngdang tali agizüktettsüsa lir.

⁴Ngasangatem tenük, aser asüküm temulungjang, tamajunger milenji temenen lir.

⁵Tenendakbapur tebilemba teperiba leni dang anir; saka tariteper shiai anüngabongba leni dang ariteper.

⁶Tiyazü temeli agi anguba rongsenji meyipzüa alungba tangula, shirnoki itemji bushir parnoki tasüba bushir.

⁷Temenenpur mit agi parnok oker oadoktsü; kechiyong parnoki ochiba inyaktsü memulung,

⁸Aibelener lenmangji tekirak; saka merükteta alir jaklaji shitak lir.

⁹Rasarabong tetsür ka den tesadem ki nung alidang nungibo, kilem kinük ka nung ali tajungba.

¹⁰Temenen pur takümi tamajung jangrar, par kiyongeri pa nükdang taochi mangur.

¹¹Sensamasarji merenshidang tongmelangerji shisa kadaktsür; aser shisa takar sayudangji, pai temetetba shisatsü ajangzüker.

¹²Temeshipuri temenenpur kibongji ajioka ayur; temenenpurji pai tesamaba nung enoktsür.

¹³Sensakertem ayimtenba shibai mangashi yutsüdir, paia ayimtentsü, saka pa dang mangashitsü.

¹⁴Kibok sempeti ain adokba, aser teku nung abenba sempeti rasaba tulu süneptsür.

¹⁵Kodang ochi o bendangdir, temeshipur asoshi tepelatsü, saka temenen inyakertem asoshi tesamaba.

¹⁶Tangatetba lenmang nungi shibai nemzüa odir, pa tasüba rogo rongnung amungtsü.

¹⁷Shibai amajok pela meimdir iba nisungji sensaker asütsü. Yi aser totzü meimerji takar makümtsü.

¹⁸Temeshipur atema temenenpurji talangzükba akümer; aser tindanger melen ashikülaker air.

¹⁹Rasarabong aser tilubangluba tetsür ka den ali dang nungi, lisem lima nung ali tajungba.

²⁰Shisa takar alidakji senti rongsen aser totzü lir; saka tamashi nisungi aji meyoka adoker.

²¹Shibai temeshiba aser yimlibilem sülen anidaker, taküm, temeshiba aser tetushi angur.

²²Shisa taka nisungi temeranger yimti jagi atur, aser parnoki temulung alemba mitsaji laodaktsür.

²³Shibaisa pei tebang aser temeli sotdir, timtem nungi pei taküm soter.

²⁴Asüküm aser ngasangatem nisung, pa tenüng tilubanglusang; pai asüküm ngasangatemba nung inyaker.

²⁵Azümesener pa taginübai pa tepseter; kechiyong pai teka mapa meinyaker.

²⁶Anogo tepiyong pai azüabunger; saka temeshipuri agütsür aser sota mayur.

²⁷Temenenpuri tenlabaji tesempatsü. Temenen mulungsentsüi pai aji bener arudang ano koda tali asütsü?

²⁸Tiyazü kuli samatsü; saka shibai angadir pai jembiba o teti alitsü.

²⁹Temenen nisungi tejak melema tenteter; saka tindangpuri pei lenmang shisadanger.

³⁰KIBUBA anema kecha shisatsü, tangatetba mesüra tesayuba mali.

³¹Korji raraba anogo asoshi renema lir; saka takokji KIBUBA meyong.