Read njo APIJEMTSÜ SHIN 22 Bible Online

APIJEMTSÜ SHIN 22 - njo bible

APIJEMTSÜ SHIN 22

¹Rongsen tulu dang nungi tenüng tajungang shimtettsüla. Hon aser taribi dang nungi maongka tajungba.

²Takar o sensaker külemi ajuruteper, parnok ajak teyanglurji KIBUBA lir.

³Tekümdang nisungi lendong angur, aser atsükadoker; saka tongmelangeri oda aor, aser timatemer.

⁴Ajemalu aser KIBUBA tsübuba sempetji, rongsen, tetushi aser taküm.

⁵Mashikoshir lenmang nungji ai aser sang lir; shibai pei taküm sotdir item nung jagi talangka pila-a alitsü.

⁶Tanur ka pei aotsüba lenmang nungji sayutetang; aser pai tain akümdang iba nungi mepilatsü.

⁷Takar jagi sensaker madak chubar; aser tapurji taputsür kilir lir.

⁸Shibai ochi mashiba prokdir lendong arutsü; aser pa terasaba ajokji amajok akümtsü.

⁹Shiba tenük tulu aten pa moatsütsü; kechiyong pai pa chiyungtsü sensaker den lemsar.

¹⁰Sensamasarji mindokang aser tatsütepba pilatsü, aser obang mapuba aser tarütsüba anentsü.

¹¹Shibai temulungjang temerük meimer, aser shibai tebang nung taochi aket, pa tembar chuba alitsü.

¹²Temetetba shisatsü akar madak KIBUBAi anüker; saka ashikülaker o pai endoktsür.

¹³Azümesener jagi ashir, “Kimalen molusongzü lir, yimdong nungji ni tepsettsü.”

¹⁴Samesatsür tebangji kangla tarok; shiba dak KIBUBA ain adoker pa ajagi tsüktsü.

¹⁵Tanur mulung nung tamashiba alenloka lir; saka temetongshiba artsüng agi aji pa nungi talangi aridoker.

¹⁶Shibai pei tajangzük renloktsü asoshi sensaker rishikangshir, aser shibai takar nem agütsür, pa anüngabong dang akümtsü.

¹⁷Ne tenarong tenang, aser shisa takar otemji angang; aser kü shisatsü nung ne mulung tendangang.

¹⁸Itemji ne den yura, parnok ne bang nung renema lir, aji jangratemtsü lir.

¹⁹KIBUBA dak ne temulung alemba ayutsü atema, oda ne dang tang tanü ni itemji metetdaktsüogo.

²⁰Tekümdangtsü aser shisatsü shinba semer, ne nem mezülutsü ama?

²¹Shirnoki na yok, parnok dangi telangzüba shitak nai agütsütsüsa, koba shitak aser ochi aji ne dang sayutsü.

²²Sensaker nungi terakzük, kechiyong pa sensaker lir; mesüra süngkhümbong nung timtemerji rishikangshi tesü.

²³Kechiyong KIBUBAi parnok asoshi noktaktsü, aser parnok rakzüker takümji rakzüktsü.

²⁴Ain-abong aketba nisung den temedem; aser rasarabongba nisung den nai tuo;

²⁵ashiko nai pa lenmangtem angazüktsü, aser ne taküm sang nung aputsü.

²⁶Tezüngzükba agütsür rongnung na ka teküm, mesüra sentsü atema terozüker rongnung teten.

²⁷Na tagütsütsü maka ta sür kechiba parnoki ne dang nungi ne yipten bener aotsü?

²⁸Ne tsüraburtemi yutsüba akhi arrtsüji tagien.

²⁹Nai mapa nung nendakba nisung ka ngualima? Pai chubatem tsüngdang noktaktsü; pai samesa nisungtem tsüngdang menoktaktsü.