Read njo APIJEMTSÜ SHIN 23 Bible Online

APIJEMTSÜ SHIN 23 - njo bible

APIJEMTSÜ SHIN 23

¹Kodang nai yimsüsür den chiyungtsü mendir, ne jakdang kechi ali junga reprangang;

²Na chidiyungdiba nisung süra, ne terok nung nai kotari yokang.

³Par anükalem chiyungtsü tenükshi; kechiyong itemji külakoktsüba chiyungtsü.

⁴Takar akümtsü temerang; aji noktangtsüsa na shisa ka-ang.

⁵Nai idakji tenük yokdang, aji oadoker; kechiyong aoksa-a rongsen dak tashikang atener orija ama anüngleni yima oadoker.

⁶Tekuru nisung meyong chiyungtsü techi, aser par anükalem chiyungtsü tenükshi.

⁷Kechiyong telunglen züngdangba nisung amaji pa lir, pai ne dang ashir, “Chiang aser jemang;” saka pa mulungjang ne den mali.

⁸Chiyungtsü tebang ka koba nai chiogo nai saktsüdoktsü, aser ne o tanangtem samatsü.

⁹Tamashir kati angashia o tejembi; kechiyong pai ne tashitemetet o sempatsü.

¹⁰Akhi arrtsü tagien; mesüra tebu malir alujagi teyi.

¹¹Kechiyong parnok Kümzüksangji tashi tait, na anema parnok asoshi pai noktaktsü.

¹²Tesayuba nungji ne mulung tenang, aser shisatsü otem lenji ne narong tenang.

¹³Lanuwa nungi temetongshibaji sota teyu, kechiyong nai pa dak artsüng agi azük yongbo pa masütsü.

¹⁴Nai pa dak artsüng agi zükra, pa taküm Sheol nungi nai kümzüktsü.

¹⁵Kü chir, ne mulung shisa kaa kümdaktsüra, kü mulunga pelatsü.

¹⁶Hau, ne bangi shitakba jembidang, kü mulungi pelatsü.

¹⁷Ne mulungjangi temenenpur tenükshi, saka anogo tepiyong nai KIBUBA tsübuba nung liang;

¹⁸Kechiyong tarutsü mapang chichia lir; aser ne teimlaji mesamatsütsü.

¹⁹Kü chir, nai angang, aser shisa kaang, aser lenmang lenji ne mulungjang aniang.

²⁰Yi pur rongnung aser shi chidiyungdir rongnung teli.

²¹Kechiyong yi pur aser chidiyungdirji sensak tiai aitsü, aser anüalembai nisung nem süjen abendaktsütsü.

²²Na asoba nebu dang angang, aser netsü tantsür akümdang tesempa.

²³Ochiba aliang, aser aji teyok; shisatsü, tesayuba aser tangatetba aliang.

²⁴Temeshipur tebuji kanga pelatsü; aser shisa taka tanur asor jagi pa indang pelatsü.

²⁵Nebu aser netsü peladakjang, aser na asola peladakjang.

²⁶Kü chir, kü nem ne mulung kua; aser ne nüki kü lenmangtem ajioka yuang.

²⁷Kechiyong nüktapangtalaji ongken tarok, aser tasü tait tetsürji kangla temesü lir.

²⁸Terakzüker ama lai mita atar, aser nisung rongnung tamang makar züinkdaktsür.

²⁹Shiba timtem ali? Shiba tejashi aka? Shiba rarabangsen aka? Shiba tashishiba aka? Shiba dak kecha masü nung zübu aket? Shiba tenük temerem aten?

³⁰Yi züngdang talangka südoksünemertem; temeyoktep yi bushitsü aortem.

³¹Yi merema alidangji, iba marok nung prangshidang, aji arema aludangji, nai teranglok.

³²Tatem nung yagi peri ama meteper, aser mim peri ama mechir.

³³Ne nüki tamangutsü oset angutsü; aser ne mulungjangi mashikoshiba jembitsü.

³⁴Hau, na tzüyim tiyong nung mejangba ka ama alitsü, mesüra rong tongshi manung mejanger ka ama alitsü.

³⁵Nai ashitsü, “Parnoki kü dak atep, saka ni meyiru; Parnoki kü dak azük, saka aji ni memetet. Kodang ni sakdir, ano tanabena ni yisa bushitsü.”