Read njo APIJEMTSÜ SHIN 24 Bible Online

APIJEMTSÜ SHIN 24 - njo bible

APIJEMTSÜ SHIN 24

¹Tamajunger nisungtem tenükshi; mesüra parnok den alitsü tejangra.

²Kechiyong parnok mulungjangi teka aitsü bushir, aser parnok tebangi tamajung indang jembir.

³Tashitemetet ajanga ki yanglur; aser tangatetba agi aji renemer;

⁴aser shisatsü agi taktangtem sentilung ajak aser rongsen taginütsü agi asünger.

⁵Tashi tait nisung dang nungi shisa taka nisung tashi taitba, aser tangatetba nisungji tashi dang nungi taoba.

⁶Kechiyong nai shisa taka leniba agi tongbang rarar, aser kibok tesayur aika lira idakji takok lir.

⁷Shisatsü otem tamashiri angatettsü makoker. Süngkhümbong nung nüngdak jembi dang pai pa tebang melapokteter.

⁸Shibai tamajung inyaktsü tasa asar; pa dangi nisungtemi tamajung inyaker ta ajatsü.

⁹Tamashiba tasa asabaji temenen; aser sensamasarji nisungtem tsüngdang tesempatsü.

¹⁰Lendong anogo nung na lulara, na tashi tila.

¹¹Tasüba leni abenertemji kümzükang, aser shirnok tepsettsü renema ali parnokji meyipa sotang.

¹²“Ajiang onoki ya memetet” ta nai shira; temulungjang odangsang jagi aji majiteter ama? Aser ne taküm anüksang jagi aji memetet ama? Aser nisung shia nem pei mapa yari pai magütsüli ma?

¹³Kü chir, nai ninang mojitzü chiang, kechiyong aji junger. Aser ninang mojitzü jeb tachitsü tanang lir.

¹⁴Ne nela asoshi shisatsüji yamaji, ta metetang. Nai aji bushitetra, ne tarutsü teimla kar, aser ne teimla tatem makümtsü.

¹⁵Temeshipur talidak anema nisung tamajunger ama arü temen. Par ki dak teka teyi.

¹⁶Kechiyong temeshi nisung tenetben laor aser ano saker. Saka temenenpur lendong agi samatsür.

¹⁷Ne tsükchir laodang tepela, aser pa metsüdakdang ne mulungjang pela-a teli.

¹⁸Ashiko KIBUBAi aji ngua pa mepelatsü, aser pa terasabaji pai pa dak nungi piladaktsütsü.

¹⁹Tamajunger inyaker aliyongbo ne sasa tashishi; aser nai temenenpur dak tenükshi.

²⁰Kechiyong nisung tamajung ar mashitsü, temenenpur milenji sepdaktsütsü.

²¹Kü chir, nai KIBUBA aser chubaji tsübuang, aser parnok ka dang danga tashi mangai teli.

²²Kechiyong parnok nungi lendong aoksa-a adoktsü; aser anaprong nungi tesamaba arutsüji shibai meteta ali?

²³Ano shisa takar jagi itemi shina liasü: O bendang dang tejak reprangba majung.

²⁴Shibai temenenpur dang, “Na tai maka” ta shidir, nüburtemi pa atakatemtsü, kintemi pa sempatsü.

²⁵Saka temenenpur arütsürtem tepela alitsü, aser temoatsü tajung parnok dangi arutsü.

²⁶Shitak telangzür jagi tebang nung meseper.

²⁷Ne mapa kimalen renemang, aser na asoshi aji alu nung kechisarena renemang, aser tesülen ne ki yangluang.

²⁸Kecha masünung ne kiyonger anema kuli teyi; aser nebang agi külakkübong tesü.

²⁹“Pai kü dang inyakba ama ni pa dang inyaktsü. Pai inyakba yari ni pa nem shia agütsütsü” ta teshi.

³⁰Azümesener alu ajanga aser tangatetba nung anünger tsükmenatzü lu leni ni süi;

³¹aser ajiang, aji ai agi sakbanger liasü. Aliji temungtsü agi sakbanger liasü, aser idakji lung tsüki jaraji raksar liasü.

³²Idangji ni reprang, aser junga shisadang; ni reprang, aser tesayuba ka angazük:

³³ Tera mejangba, tera amoa aoba aser anisüngzüktsü asoshi teka mesüteper alidang,

³⁴rakzükraktemer ka ama ne dangi sensak tia aser anüngabongba ne madangi nok o nü amba nisung ama arutsü.