Read njo APIJEMTSÜ SHIN 25 Bible Online

APIJEMTSÜ SHIN 25 - njo bible

APIJEMTSÜ SHIN 25

¹Itemia Solomon apijemtsü shin, koba Yihuda chuba Hezekia nisungtemi züluzük.

²Mapa ka miimtsüji Tsüngrem sentsüwangshi; saka mapa ka bushitsüji chuba sentsüwangshi.

³Anüngtem alangba ama aser alima arokba ama, chubatem mulungjangji mebushitet.

⁴Taribi nungjagi yinsüji endokang, aser yintsünger asoshi marok yanglutsü oset kar.

⁵Temenenpurji chuba tsüngdang nungi endokang, aser pa chuba menden temeshiba nung yangertsü.

⁶ Chuba tsüngdang ne sasa tesayu, aser tulur rongnung tenoktak.

⁷Kechiyong ne nüki anguba chuba tsüngdang nungi na ludaktsü dang nungibo temaleni atung ta ne dang shitaktsüba tajungba.

⁸Ne nüki kechi angur aji obendangdaki aritaka bener tuo. Ashiko, ne kiyongeri na maksüdaktsü dang, tatembang nung nai kechiang inyaktsü meshitettsü.

⁹Ne kiyonger den ne indang lemtepang, saka tangar miim o terakpoktsü.

¹⁰Ashiko aji angashibai na sensamasatsütsü, aser ne tenüng menük mepilatsü.

¹¹Mapang tesütep nung jembiba oji taribi yanglokba nung hon süngjang ama.

¹²Angaba tenarong nung, shisa taka tarütsübaji, hon küri, aser hon sobutsü mesük.

¹³Alurudang rürjeb mokongba ama, tamangtsü osang benerji pa yoker tsüngdang lir. Kechiyong pai par kiburtem taküm süneptsür.

¹⁴Yazüa pei sempet indang mezümekemerji, tzünglu mabenba mepet aser mopung mesük.

¹⁵Talangka aremzükba agi yimsüsür mesüzüker, aser temeli tanük agi teretji raksatsür.

¹⁶Nai ninang mojitzü nguogo ma? Na peri dang chiang. Ashiko nai aji agi laka chir, aji saktsüdoktsü.

¹⁷Ne kiyonger ki jagi netsüng züngteta dang odakjang, mesüra pai na laktettsü, aser na sempatsü.

¹⁸Pei kiyonger anema tiyazü kuli abenerji, takuba merang, aser nok, aser techira lijakjang lir.

¹⁹Timtem mapang nung mamangtsü nisung dak temulung alembaji, tepu tamajung mesüra tetsüng tatsük mesük.

²⁰Tejashi mulungjang dang ken tenyubaji, asükwa kari sü ludokba aser komo nung tasentzü ama lir.

²¹Ne tsükchir yara, pa nem chiyungtsü agüjang; aser pa tzürara, pa nem tajemtsü tzü agüjang.

²²Kechiyong nai pa tekolak manung mijang nangtentsütsü, aser KIBUBAi ne nem sempet agütsütsü.

²³Anüolentip mopung jagi tzünglu bener arur. Yamaji o tutepba temeli jagi tejashi tejak tendaktsür.

²⁴Rasarabong tetsür ka den tesadem ki nung alidang nungibo tsüngbang kinük ka nung ali tajungba.

²⁵Tzüraba taküm asoshi temokong tzü ama, linük talang nungi osangtajung lir.

²⁶Lishi aliba tzüpokdak aser temenen tzübu ama, temenenpur tsüngdang hai-haura akaba temeshi nisungji lir.

²⁷Ninang mojitzü jenti achitsü majung. Anungji tangar kümdanga sangang.

²⁸Shibai pei tanela mazüokteter, pa teraksa aser jara maketba yimti ka mesük.