Read njo APIJEMTSÜ SHIN 26 Bible Online

APIJEMTSÜ SHIN 26 - njo bible

APIJEMTSÜ SHIN 26

¹Meiwa rürjep mesüra alurua tzünglu ama, tamashir asoshi tetushi mapet.

²Alushijak nemzüba ama, ozü tila yimzüba ama, kecha masü nung atakatembaji mataloker.

³Kor asoshi artsüng, gado asoshi lakem, aser tamashirtem rongdong asoshi ajok.

⁴Tamashir ka dang tamashir ama telangzü, mesüra na-a pa mesük alitsü.

⁵Tamashir kadang pa tamashiba yari langzüang, mesüra pa pei nükdang tashir akümtsü.

⁶Tamashir ket nung osang yokbaji pei tsüng leptoker, aser teraksaba ajemer mesük.

⁷Tamashir tebang nung apijemtsü shinji, tsüngtsüker tetsüng tagidak makai enshishia ali ama lir.

⁸Lisü nung lung alenlokba ama, tamashir nem tetushi agütsürji lir.

⁹Yi mesepba ket nung ai aiba ama, tamashirtem bang nung apijemtsü shin lir.

¹⁰Shibai süisüponger tamachi mesüra yipru aar, paji tejak dak zübu kettsüba lijak amer ka mesük.

¹¹ Azüi pei saktsüba dangi meyipba ama, pei tamashiba leplalepshirji lir.

¹²Nai nisung pei külakkübong nung shisa ka-a nguali ma? Pa dang nungi tamashir teimla tali lir.

¹³Azümesener jagi ashir, “Lenmang nungji molusongzü lir. Yimdong nungji molusongzü lir.”

¹⁴Kishi kepja nung ayushi ama, azümeseneri pei yipten nung meyipshir.

¹⁵Azümeseneri pei teka ausu nungji amuoker; aser aji tanabena majungketnür.

¹⁶Nisung teneti agütsüba kuli dang nungi, tamashirji pei nükdang shisa takaba.

¹⁷Shibai pi raradak tebang air, paji süia aoba azü narong nung amba mesüka lir.

¹⁸Milungsang, lijakjang aser tasüba ondaktsüba yiar nisung ama,

¹⁹“Ni asayar dang” ta shia pei kiyonger külakoktsüba nisungji lir.

²⁰Süng melira mi sepadoker. Aser miim o benshir malidak rarabangsen anener.

²¹Mijang tait nung mijang ama, aser süng nung mi ama, rara adoktsü asoshi rarabangsenba nisungji lir.

²²Miim o benshirtemji chiyungtsü tajung ama, aser itemji tepok telunglen jagi air.

²³Bangsobanglem tebang aser temenen mulung, taribi yinsü nülokba ali pa ama lir.

²⁴Tesempari tiyazü bang adener, saka külakkübongba pai pei mulung nung bendener.

²⁵Pai tajung jembidang, pa dang tamang. Kechiyong pa mulung nung tesempatsü tenet lir.

²⁶Pa sembabaji tekülak agi nembanger liaka, pa temenen telok rongnung pokbatsü.

²⁷Shibaisa kangla tudir pa idakji tsüktsü, aser shibai lung mezüdir aji pa dangi meyiptsü.

²⁸Tiyazü temeli jagi pai yirutsüba purtem sempar; aser mesüzükba nanga jembiba tebangi teraksa adoktsür.