Read njo APIJEMTSÜ SHIN 27 Bible Online

APIJEMTSÜ SHIN 27 - njo bible

APIJEMTSÜ SHIN 27

¹ Asüng indang ne sasa mezümeküm tesü; kechiyong anogoi kechi bener arutsü nai memetet.

²Nebangi masü tangari na sangdakjang.

³Lung aser lisem seret odangba kanga taret. Saka tamashir rasabaji anaprong dang nungi taretba.

⁴Terasabaji tamachi, ain adokbaji tzümetsüng; saka tenük meremba tsüngdang shibai noktaktet?

⁵Miima meimba dang nungi, rakpoka arütsüba tajungba.

⁶Tembari yirutsübaji temulung alemtsü; saka tsükchir tebang mesepbaji tashioktsüba.

⁷Shiba tepok sünga ali pai ninangjep sempar; saka tayaba taküm tsüngdang taku ajak tanang lir.

⁸Pei tesep nungi nemzüba ozü ama, pei talidak nungi nemzüba nisung lir.

⁹Totzü aser teronem menemtsü agi temulung peladaktsür; saka tanelabo timtem agi ala-ashir.

¹⁰Ne tembar aser nebu tembar senzüka teyutsü; aser ne lendong anogo nung adianu kidangi tuo. Talang nung aliba adianu ka dang nungi ana nung aliba kiyonger tajungba.

¹¹Kü chir, shisa kaang, aser kü mulung peladakjang, sürabang kü tarütsür dang ni langzütet.

¹²Tekümdang nisungi lendongji angur, aser pei sasa atsüker; saka tongmelangeri odang aor, aser ibayongji timatemer.

¹³Bendanger atema terozüker meyong süoshiji agiang; aser bendanger atema terozükerji tezüngzükbai idakjang.

¹⁴Anepdang yakta saker shibai ayimtena pei tembar dang salem o ashir, aji pa asoshi atakatem ta züngshitsü.

¹⁵Tzünglu aruba anogo nung tzünglu maneni asenba ama; rarabangsenba tetsürji lir.

¹⁶Shibai la noktangdir mopung noktanger, mesüra pa tajichi teka agi totzü dak ameter.

¹⁷Merangi merang chiradaktsür; yamaji nisung kati tangar chiradaktsür.

¹⁸Shibaisa monguzünu dong anebaludir iba tejangji achir, aser kilir shibai pei kibur anebaludir tushitsü.

¹⁹Tzü nung tejaki tejak sayu ama, nisung mulungi kobala nisung, aji sayur.

²⁰Sheol aser Teraksatsüsang kodanga tip matemer; aser nisung tenüka kodanga masünger.

²¹Senzükba poji taribi asoshi, aser misembongji hon asoshi; yamaji nisung jaklaji pa asangba agi tendanger.

²²Tsük temokzük den, semki nung ali agi tamashir ka ajensang; yongjia pa tamashiba pa nungi mepilatsü.

²³Ne san teloktem kanga junga meteta yuang, aser shiruru teloktem junga reprangang.

²⁴Kechiyong rongsen teti asoshi masü; aser chuba korang jagi teti asoshi amongtemdi ma?

²⁵Kodang monüji agiener aser rem lanuji adokdir, aser tenem nungi süngoliotem bendendir,

²⁶san chanutemi ne tabenba sü agütsütsü, aser nabongtemi alu jenjang agütsütsü.

²⁷Aser ne chiyungtsü, aser ne kibong chiyungtsü; aser aenertem mesütsü asoshi nabong mamatzü teperi alitsü.