Read njo APIJEMTSÜ SHIN 28 Bible Online

APIJEMTSÜ SHIN 28 - njo bible

APIJEMTSÜ SHIN 28

¹Shingai marishidang temenenpuri ajener; saka temeshipur molusongzü ama tasü tait.

²Alima ozüng raksabayong idakji yimsüsür aika akümer; saka tangatetba aser shisatsü aliba nisung agi yimliji langdaktsütsü

³Yimsüsür shibai sensaker rishikangshir, paji chiyungtsü kecha meyutsüi oker aoba tzünglu mesük.

⁴Ozüng senzüka toktsür jagi temenenpur asanger; saka ozüng benshirtemi parnok anema noktaker.

⁵Tamajungeri ochiba mangateter, saka KIBUBA bushirtemi aji jungjunga angateter.

⁶Takar liaka, pei lenmang nung mashikoshir dang nungi, Tindangba nung jajar sensakerji tajungba.

⁷Shibai ozüng benshir pa shisa taka jabaso; saka chidiyungdirtem den medemeri pei tebu maksüdaktsür.

⁸Shibai sentem aser tetemlok agi pei rongsen züindaktsür; sensakertem dak aria bilemsang asoshi aji bendener.

⁹Shibai ozüng angaba nungi pei narong meyiper, pa sarasademjia tesempatsü.

¹⁰Shibaisa tindanger tamajung leni pila-a odaktsüdir, pa pei kangla nung tsüktsü. Saka tai makari senmang tajung amangtsü.

¹¹Takar nisungji pei nükdang shisa taka, saka tangatetba akar sensakeri paji bushitsü.

¹²Temeshipuri akok dang sentsüwangshi tulu lir; saka temenenpur temai atudang nisungtemi atsüker.

¹³Shibai pei ozüng raksaba miimdir, azükaru masütsü; saka shibaisa itemji nangzükdir aser toktsüdir, yimlibilem angutsü.

¹⁴Shibai KIBUBA tsübur pa pelatsü; saka shibai pei mulung merangdir lendongi aitsü.

¹⁵Tarüba molusongzü aser tarüba shirem ama, sensaker madak yimsüsür tamajungji lir.

¹⁶Tangatetba nung anüngba yimsüsürji ano rishikangshir tulu; saka shibai azüabungba sempadir pa arishi alangtsü.

¹⁷Nisung kati azü tokshiba ajanga khuret bena lira, pa masü tashi jenshia aoba nisung kümdakjang; shingaia pa teyari,

¹⁸Shibaisa indang indanga jajadir kümzüktsü; saka pei lenmang nung mashikoshirji kanglai tsüktsü.

¹⁹Shibai pei lu yimdir chiyungtsü peria angutsü; saka shibai amajok mapa arishidir, sensak tia peria angutsü.

²⁰Temulung lemtetba nisung temoatsü akar; saka shiri takar akümtsü arishir, pa memerenshi-i malitsü.

²¹Nisung dang tejak reprangtsü majung; saka nisungi chiyungtsü tilaka asoshi ozüng raksar.

²²Tekuru nisungi rongsen sülen ariteper, aser pa dangi anüngabong arutsü ta memeteter.

²³Temeli agi mesüzüka nanga jembir dang nungi nisung arütsüri tesülen maongka tali angutsü.

²⁴Shibaisa pei tebu aser tetsü dang nungi rakzüker, aser ashir, “Ya ozüng raksaba masü,” paji teraksar medemer.

²⁵Merumeru nisungi rarabangsen adoktsür, saka shibai KIBUBA dak temulung lemdir yira-a kümdaktsütsü.

²⁶Shibai pei tebilemba dak temulung lemdir, pa suwar; saka shibai shisa ka-a jajadir, pa kümzüktsü.

²⁷Sensaker nem agütsürji manüngtsü; saka pei tenük nembangerji atakatem aika dang angutsü.

²⁸Temenenpur temai atudangji, nisungtemi parnok sasa atsüker; saka parnok samadang, temeshipurtem arener.