Read njo APIJEMTSÜ SHIN 29 Bible Online

APIJEMTSÜ SHIN 29 - njo bible

APIJEMTSÜ SHIN 29

¹Aiben arütsü nung shibai tekong merangdir, pa aoksa-a samatsü, aser tanebtsü mangutsü.

²Temeshipur arendang, nüburtem pelar; saka temenen nisungi yimsü asüdang nüburtem asüktemer.

³Shibaisa shisatsü meimdir pai tebu peladaktsür; saka shibai nüktapangtsürtem den medemer pai pei rongsen lalur.

⁴Chubai ochiba agi alimaji yanger, saka shibai sempet akhanger pai aji atsüngdoker.

⁵Shibai pei kiyonger tiyazü nung asanger, pai pei jenjang asoshi zütsük mesanger.

⁶Tamajung nisungji ozüng raksaba nung apur; saka temeshipuri ken atener aser pelateper.

⁷Temeshipuri sensaker tim indang meteter; aji metettsü temenenpur dak tangatetba mali.

⁸Sensamasari yimti ka rongtoktsür; saka shisa takari terasaba meyipdaktsür.

⁹Shisa takari tamashir nisung ka den okai ora; tamashiri odang rasar aser menür, aser tiptem mali.

¹⁰Azü jangrar jagi tai makar sempar; aser tamajungeri pa taküm bushir.

¹¹Tamashiri pei rasaba ajak jembir; saka shisa takari aji soter aser süngjemtsür.

¹²Yimsüsüri tiyazüba dang angarabang, tongtipur ajak temenen akümtsü.

¹³Sensaker aser rishikangshir külemi ajuruteper; KIBUBAi tenaprong nem tesangwa agütsür.

¹⁴Chuba shibai tamangtsüsa sensakertem o shitak bendanger, pa chuba mendenji teti asoshi yangera alitsü.

¹⁵Artsüng aser tarütsübai tashitemetet agütsür; saka pei sünütsüsa toktsüba tanuri pei tetsü maksüdaktsür.

¹⁶Temenenpur bangdak, ozüng raksaba züiner; saka temeshipuri parnok laoba angutsü.

¹⁷Ne jabaso metongshiang, aser pai ne nem anisüngzük agütsütsü. Hau, pai ne mulung nung tepela agütsütsü.

¹⁸Kong ainkar sayutsüngi mali, nübur tesotba mali, saka shibai ozüng benshir, pa tepelatsü.

¹⁹Kilir ka o agi memetongshitettsü; kechiyong pai angatetaka, temulung magütsütsü.

²⁰O nung tekara nisung ka nai ngualima? Pa dang nungi tamashir ka teimla taoba.

²¹Shibai kilir lanuwa nungi anükalema mesüteter, pai tesülen tejashi bener arutsütsü.

²²Rasarabongba nisungi rarabangsen adokdaktsür, aser rasarabongba nisungi ozüng aika raksatsütsü.

²³Nisung ka asükümi pa teküboki anizüktsü; saka ajemalubai tetushi angutsü.

²⁴Shibasa auür den medemdir, pai pei taküm sempar, pai atakatembaji angashir saka kecha mejembir.

²⁵Nisung tsübubai sang bena arur; saka shibai KIBUBA dak temulung lemdir kümzüka alitsü.

²⁶Aikati yimsüsür maongka bushir; saka ochi obendangba KIBUBA nungi arur.

²⁷Ochi mashir nisung temeshipur tsüngdang tesempatsü; saka pei lenmang nung tindangerji temenenpur tsüngdang tesempatsü.