Read njo APIJEMTSÜ SHIN 3 Bible Online

APIJEMTSÜ SHIN 3 - njo bible

APIJEMTSÜ SHIN 3

¹Kü chir, kü tesayuba tama. Saka ne mulungjangi kü ozüngtem yuang.

²Kechiyong anogo alangba, aser taküm arishi tajung talubosa, aser tesünep, parnoki ne nem agütsütsü.

³Akhümtsübuba aser tamang katetbai na tetoktsüma. Itemji ne tekong nung alenlokang; itemji ne mulung lungpak manung züluokang.

⁴ Sürabang nai Tsüngrem aser nisung tsüngdang, tesaklokba aser tenüng tajung tangatetba angutsü.

⁵Ne mulung ajak agi KIBUBA dak amangang, aser na pei teshisadangba nung temulung lema teli.

⁶Ne lenmang ajak nung pa agizükang, aser pai ne lenmangtem metongtsütsü.

⁷ Na pei tenük dang tashitemetet teküm; KIBUBA tsübuang, aser temenen nungi pila-ang.

⁸Aji ne shi asoshi tanebtsü, aser ne teret asoshi mozü alitsü.

⁹Ne takaba agi aser ne renlokba nung, mezüngbuba süngjang agi KIBUBA tushiang.

¹⁰Sürabang ne jentem teperiba agi asüngtsü, aser ne mori nungi yi lanu agi moteta ayimtsü.

¹¹ Kü chir, KIBUBAi metongshitsüba tesempa, mesüra pai arütsüba agi telaktet.

¹² Kechiyong tebui pei mulung atokba chir dak ama, KIBUBAi shiba meimer pa dang arütsür.

¹³Tashitemetet shibai bushitet, aser shibai tangatetba angur, pa tepelatsü.

¹⁴Kechiyong aji ajangzükbaji taribi ajangzükba dang nungi tajungba, aser iba nungi ajangzükbaji hon dang nungi taoba.

¹⁵Sentilung dang nungi la sentiba. Nai aginüba osettem kecha dena laji medemdangtsü makok.

¹⁶Arishi talang la tajichilen lir; la tabelen rongsen aser khonang lir.

¹⁷La lenmangtem jangratemtsü lenmangtem lir, aser la lenmang ajak tesünep lir.

¹⁸La dak azüitba pur asoshi la taküm süngdong ka lir. Shirnoki la dak azüiter parnok dang tepelatsü ta ajar.

¹⁹KIBUBAi tashitemetet agi alimaji aküm; tangatetba agi pai anüngtem yanger.

²⁰Pa shisatsü agi taroktem nungi tzü adokdaktsür, Aser mepettemi azüngtzü tsükdaktsür.

²¹Kü chir, parnok ne tenük nungi tepiladaktsü. Ochi obendangba tashitemetet aser teshisadangba yuang.

²²Anungji parnok ne tanela atema taküm, aser ne tekong atema tazütsü alitsü.

²³Sürabang nai ne lenmang nung jenbua jajatsü, aser ne tetsüng memetsüdaktsü.

²⁴Kodang nai mendir, nai metsübutsü. Hau, nai mangadak dang, na mejangba tanang alitsü.

²⁵Ajongben taoksatsü asoshi, mesüra tamajunger yipru kodang arudir, tsübua teli.

²⁶Kechiyong KIBUBA ne temulung alemba alitsü, aser ne tetsüng memetsüdaktsüi sottsü.

²⁷Ne keti inyaktsü tashi alidang, shir dang tajung inyaktsü tsüa ali, parnok dang nungi sota teyu.

²⁸Na kaa alidang, ne kiyonger dang, “Oang aser tanaben arung, aser asüng ni ne nem agütsütsü” ta teshi.

²⁹Ne den tamang kaa aliba ne kiyonger anema nai tamajung teinyak.

³⁰Ne dang tamajung kecha inyaka melira, kecha masü nung nai nisung ka den terara.

³¹Mit aketba nisung ka nai tenükshi, aser pa lenmang ka danga teshim.

³²Kechiyong mashikoshi nisungji KIBUBA tsüngdang tesempatsü lir. Saka tindangertemji pai temulung lemteta lir.

³³Temenenpur ki nung KIBUBA atakatem lir; saka temeshipur talidak pai moatsür.

³⁴ Atangji sensamasatsürtem pai sensamasatsür; saka ajemalur nem pai taochi agütsür.

³⁵Shisatsü akari sentsüwangshi senmang amangtsü; saka suwartemi maksü bener arur.