Read njo APIJEMTSÜ SHIN 30 Bible Online

APIJEMTSÜ SHIN 30 - njo bible

APIJEMTSÜ SHIN 30

¹Yake Jabaso, Agur o jungkai adokbatem: Nisung jagi Ithiel dang ashir, Ithiel aser Ukal dang;

²atangji ni nisung memesüki suwar mesük, aser nisung tangatetba kü dak mali.

³Ni tashitemetet mangazük, mesüra Temeshibaji ni memetet.

⁴Shibai kotaki atu aser alu? Shibai pa kabu nung mopungji benden? Shibai tzüyimtem pa sü nung atem? Shibai alima tatembang ajakji yanger? Pa tenüng kechi, aser par chir tenüng kechi? Atangji nai metet!

⁵Tsüngrem o ajak shitak ta kuli adoker. Pa dak jenokbapur asoshi pa jong lir.

⁶Pa o nung nai tebendenlok, mesüra pai na arütsütsü, aser na tiyazü kümdaktsütsü.

⁷Ne dang nungi ni oset ana mepishir; ni masü dang, nai itemji kü dang nungi tesongtem ma.

⁸Kü dak nungi tiyazü aser tai talangi agienang; kü nem sensak tia mesüra rongsena tagütsü; ni asoshi tenüngdaktsü chiyungtsü agi ni mesüangma.

⁹Ashiko ni tepok süngerbo, na menangzüktsü, aser ashitsü, “KIBUBAji shiba?” Mesüra ashiko, ni sensaktsü aser auyatsü, aser Tsüngrem tenüng amajok nung amshitsü.

¹⁰Kilir kati pei kibur tetiludaktsü, mesüra pai na atakatemtsü, aser na tai ta züngshitsü.

¹¹Pei tebu atakatemba, aser pei tetsü memoatsüba nisungtema lir.

¹²Shir pei nükdang temerük, saka parnok memerükba nungi meshidok.

¹³Nisung kar lir, parnok tenük koda ngasangatem! Aser parnok nükeptsü rangloka lir!

¹⁴Alima nungi sensakpur aser nisung rongnungi tenüngdaktsü aliba pur chimatsü, nok tepu atenba, aser teküm nung kotari tepu atenba lir.

¹⁵Bangchi jala ana lir: “Kua, Kua” ta parnoki asar. Kodanga tip matemba oset asem lir, hau, pezüi “Teperi” ta kodanga mashir:

¹⁶Sheol, nu tabung menden, tzü agi tip matemba lima, aser, “Teperi” ta mashiba mi.

¹⁷Tenük kobai pei tebu sensamatsür, aser pei tetsü dang angatsü sempar, ayongnu warotemi aji aroktoktsü, aser hogoni aji achitsü.

¹⁸Ni asoshi onsara tesüngmangtsü oset asem lir, hau, pezü, koba ni memetet:

¹⁹Anüng nung orija lenmang, lung manung per lenmang, tzüyim tiyong nung rong lenmang, aser aiür ka den tebur yimya.

²⁰Nüktapangtatsür lenmangji yamai: Lai achir, aser la tebang aidoker, aser ashir “Ni kecha temenen meinyak!”

²¹Alimai oset asem asoshi atentener, aser pezü asoshi yagi maremzüker:

²²Kilir ka chuba akümdang, tamashir ka chiyungtsü agi tepok sünga alidang,

²³temeimer maliba tetsür ka kinungpu angudang, aser kilitsür kati lar kiburla senmang amang dang.

²⁴Alima nung oset tila pezü lir, saka parnok kanga shisa aka:

²⁵Mejatem tashi mait telok ka, saka mei nung parnoki parnok chiyungtsü bendener.

²⁶Shisentem tashi mait telok ka, saka parnoki parnok talidak lungpok nung yanglur.

²⁷Süngkutem chuba mali, sakasa parnok ajak telok kümer aor.

²⁸Sangkenji pei teka nung pua arur, sakasa la chubatem kidang alir.

²⁹Jajadang akhüm taket oset asem lir, hau, senzü dang akhüm taket pezü lir:

³⁰Molusongzü, shiruru ajak rongnung tashi tuluba, aser pai kecha tsüngdang memeyiper.

³¹Angümtena jajaba antipung, nabong tepong aser chuba shiba anema apusoba mali.

³²Nai ne sasa ajungket dang mashimalui inyaka lira, mesüra nai tamajung bilema lira, nebang nekabui nembangang.

³³Mamatzü ayitep nung mamatzü telong adoker. Teni ajet nung azü adoker. Yamaji arishia ain adokba agi rarabangsen adoker.