Read njo APIJEMTSÜ SHIN 31 Bible Online

APIJEMTSÜ SHIN 31 - njo bible

APIJEMTSÜ SHIN 31

¹Lemuel chuba o jungkai adokba, koba tetsüi pa dang sayu:

²“Kechi, kü chir, kü nu menden chir, kechi? Aser Oh kü tezüngzükba chir, kechi?

³Ne tashi tetsür nem tagütsü, mesüra ne lenmangtem kobai chubatem samatsür.

⁴Oh Lemuel, yi ajemtsü chubatem asoshi masü, aji chubatem asoshi masü; mesüra yimsüsürtemi temesepba yi mebushitsüla.

⁵Ashiko parnoki ajemtsü aser ozüngji amatsü, aser timtemer dang ochiba tsüa aliba meyipsatsütsü.

⁶Samatsü renema alir nem temesepba yi agüjang, aser taküm nung kurema alir nem yi agüjang.

⁷Parnoki yi jemdakjang, aser sensak tia amadakjang, aser pa timtem ano tali tebilemtetdaktsü.”

⁸“Pei temeten o mejembitetertem asoshi aser lajameret ajak asoshi ne bang lapokang.

⁹Ne bang lapokang, ochishia o bendangang, aser sensaker aser tenüngdaktsü pur dang ochiba tenzükang.”

¹⁰Tetemsütsür ka shibai ngutet? Kechiyong la berem dang nungi sentiba,

¹¹La kinungpu temulungjangi la dak temulung alemer, aser pa tajangzük nung anünga malitsü.

¹²Lai la arishi tepiyong, pa dang tamajung masü tajung inyaker.

¹³Lai tezüng aser ang tanük bushir aser la keti mulungsoa inyaker.

¹⁴La shidi bener rong mesük, kobai talang nungi lai la chiyungtsü bena arur.

¹⁵Manga alidang lai saker aser lar kibong nem chiyungtsü agütsür, aser lar aiürtem nem teinyaktsü mapa agütsür.

¹⁶Lai alu ka bilemer aser aji alir; la teka agi aatenba agi lai tsükmenatzü lu ayimer.

¹⁷Lai la teperem tashi agi nangri akanger, aser la tepen tashi itdaktsür.

¹⁸Lai la tajangzük junger ta meteter; ammang nung la milen maseper.

¹⁹Lai angenba talungtsü nung la tekati amtaker, aser la tekati bangtemtsü nung ameter.

²⁰Sensaker dang lai la teka salar; hau, lai la teka agi tenüngdaktsü pur atonger.

²¹Lar kibong asoshi rüjep tsübua mali; kechiyong lar kibong ajonga temerem tezüng sü abena lir.

²²Lai la asoshi tanük ayak aketba temelem sü yanglur; la süoshi kümpa sü tajung aser nakrema meremba.

²³Yimti süngkhüm nung linük tebu-tedi rongnung amendang, la kinungpu meteta adoker.

²⁴Lai kümpa sü yanglur aser itemji ayoker; shidi bener nemji peremlen agütsür.

²⁵Tashi aser akhüm la sobutsü; aser tarutsü mapangji lai menütsür.

²⁶Lai shisatsü kaa la tebang lapoker; aser la temeli nung yimlibilem ozüngji lir.

²⁷Lar kibong mapatem lai junga repranger; aser azümesen chiyungtsü machir.

²⁸Lar chirnur saker, aser la dang temoatsü ta ajar; la kinungpuia, la sanga ashir;

²⁹“Tetsür aikati temsüa inyakogo, saka nai parnok ajak ajatetogo.”

³⁰Mera aketbaji külakoktsüba aser tobur ajungbaji amajok lir. Saka tetsür shibai KIBUBA tsübudir, la asangtsü tim.

³¹La keti züsentetba la nem agüjang; aser la mapa agi yimti süngkhüm nung la sangdakjang.