Read njo APIJEMTSÜ SHIN 4 Bible Online

APIJEMTSÜ SHIN 4 - njo bible

APIJEMTSÜ SHIN 4

¹Kü chirtem, tebu kati sayuba angang, aser tengujemtsü metettsü temulung agüjang.

²Kechiyong ni nenok nem tesayuba tajung agütsür; kü tesayuba nenoki senzüka teyutsü.

³Kodang kübu den anükalemba techir ka ni liasü, aser kütsü nükdang temulung atokba liasü,

⁴pai kü dang sayu aser kü dang ashi, “Ne mulungi kü otem azüitang, kü ozüngtem benshiang, aser taküm liang.

⁵Tashitemetet nguang, tangatetba nguang; tamadok, aser kü bang otem nungi pila-a tuo;

⁶La senzüka teyutsü; aser lai na sota ayutsü; la meimang aser lai na anüktsü.

⁷Tashitemetet tetenzükji ya, tashitemetet nguang; aser nai kechisa ngudir nguaka tangatetba nguang.

⁸La kanga senang aser lai na tudaktsütsü; nai la azüitra, lai na tushitsü.

⁹Lai ne kolak nung narozük azüktsütsü; tobur tajung chuba korang ka lai ne nem agütsütsü.”

¹⁰Angang, o kü chir, aser kü o agizükang; aser ne arishi talang alitsü.

¹¹Ni na tashitemetet lenmang nung sayutetogo. Ni na tindangba lenmang nung aniogo.

¹²Kodang nai jajadir,ne jenjangtem mesüa malitsü; aser nai asemra memetsüdaktsü.

¹³Tesayuba nung akanga ametang. La techiok, la nükang, kechiaser laji ne taküm lir.

¹⁴Tamajunger lenmangi teyi, aser temenen nisungtem lenmang nungji tejaja.

¹⁵Aji paidokang, idakji tejaja; Iba nung jagi meyipang, aser meria oang.

¹⁶Kechiyong parnoki temenen meinyak tashi amoa moteter. Parnoki kar malangdaktsüra, parnok amoa motettsü.

¹⁷Kechiyong parnoki temenen chiyungtsü achir, aser mit aketba yi ajemer.

¹⁸Saka temeshipur lenmangji anepung sangwa ama lir, kobai anüngdang matong tashi tali tali sangwar.

¹⁹Tamajung pur lenmangji tammang temelem ama lir. Parnoki kong metsüdaker, parnoki memeteter.

²⁰Kü chir, kü o nung temulung agüjang; kü shin otem len ne narong tenjang,

²¹Parnok ne tenük nungi tepiladaktsü; parnok ne mulungjang tiyong nung rizüngang.

²²Kechiyong parnok bushitetertem asoshi parnokji taküm, aser parnok shi asoshi tanebtsü lir.

²³Ne mulungjang kanga nendaka mitang; kechiyong iba nungi taküm nung tzüpokdak adoker.

²⁴Ne dak nungi tekirak o jembiba piladakjang, aser mashikoshi jembiba ne dak nungi talangka piladakjang.

²⁵Ne nüki shitak tejaklen reprangdakjang, aser ne rangetba ne tejak dang indangdakjang.

²⁶ Ne tsüng koleni aor kümdangang, aser ne lenmang ajak timi alitsü.

²⁷Tajichileni mesüra tabeleni temeyip. Temenen nungi ne tsüng agienang.