Read njo APIJEMTSÜ SHIN 5 Bible Online

APIJEMTSÜ SHIN 5 - njo bible

APIJEMTSÜ SHIN 5

¹Kü chir, kü tashitemetet len temulung agüjang, aser kü tangatetba len tenarong tenang.

²Anungji nai teshisadangba sota yutet, aser ne tebangmechi-i temetetba rizünga yutet.

³Kechiyong samesatsür tebang nungi ninang mojitzü jenzüka aludaktsür, aser la tebang totzü dang nungi tanülaba lir.

⁴Saka tatembang nung takutzü ama la taku lir, aser anatsü nok ama techira.

⁵La tetsüng tasüba leni alur; la mera Sheol leni aor;

⁶Anungji lai tesüsü lenmangji taküm nung mungui nemzür aser lai aji memeteter.

⁷Anungji tang, kü chirtem, kü dang angang, aser kü bang otem nungi pila-a tuo.

⁸Tetsürla nungi ne lenmangji talangka piladakjang, aser lar ki kishi anasa tuo,

⁹mesürabang nai ne tetushi tangar nem, aser ne arishi maochibatem nem agütsütsü.

¹⁰Mesürabang aenertemi ne rongsen agitsü, aser nai züsentetba bendanger ka kidangi aotsü.

¹¹Aser ne taküm atemdang, ne mang aser ne shi chima-a akümdang, nai anüngtsü,

¹²aser ashitsü, “Ni temetongshiba koda sempa. Aser ni tarütsüba koda sempa!

¹³Ni kü tesayur ola manga, mesüra kü dang sayurdang tenarong maten.

¹⁴Telok sentepba rongnung, ni khenyongi dang teraksar lir.”

¹⁵Ne meyong tzüshi nungi tzü, aser ne meyong tajemba tzübu tzü jemang.

¹⁶Ne tzüpokdak aser ayongnu tzü ajaklen ayimdaker, yimtongtem nung pakshidaktsütsü tim asü?

¹⁷Itemji ne jurila lidakjang, aser ne den aliba aener meyong tekümdaktsü.

¹⁸Ne meyong tzüpokdakji moajangma, aser ne asangwa kibutsü dang pela-ang.

¹⁹Temeimtsü shitsü tsüla ka ama, aser mera taket mesü tsüla ka ama, la temeim agi na teti temulung südakjang; la temeim agi na teti kangokdakjang.

²⁰Kü chir, samesa tetsür kati kechiba na mesüzükdaktsütsü, Aser pi kinüngtsü teku nung kechiba azüittsü?

²¹Kechiyong nisung lenmangtemji KIBUBA tenük jakdang lir; aser pa lenmang ajak pai anüker.

²²Tamajunger temenen agi pa sang nung apur, aser pa pei temenen mapa agi apur.

²³Pa temetongshiba agi meperiba yong asür, aser pa tamachi uluba yong pa samar.