Read njo APIJEMTSÜ SHIN 6 Bible Online

APIJEMTSÜ SHIN 6 - njo bible

APIJEMTSÜ SHIN 6

¹Kü chir, na pei kiyonger asoshi terozüker küma lira, nai aener ka den teka amtepa lira,

²na ne bang o agi pudakja lira, na ne bang o agi agidakja lir.

³Tang ya inyakang, kü chir, aser ne sasa jentetang. Ne kiyonger tashi agi na ameta lir, oang, ne sasa ajemaluang, aser ne kiyonger mepishiang.

⁴Ne tenük amoa tuodaktsü, mesüra ne nükeptsü chila-a telidaktsü.

⁵Mesü ka shikar ket nungi ama, aser ozü ka ozüpur nungi ama ne sasa jentetang.

⁶Oh azümesen, na meja dangi oang. La yimya bilemdangang aser shisa ka-ang;

⁷Bangdak terepranger, mesüra yimsüsür meliaka,

⁸pei chiyungtsü mei nung renemer, aser aluruwa pei chiyungtsü bendener.

⁹Oh azümesen, nai kopiga mejangtsü? Na mejangba nungi nai kodang saktsü?

¹⁰ Tera dang mejangba, tera dang tenük lentepba, mangadaktsü tera dang teka mesütepa alidang,

¹¹nemzüa senzür ka ama, ne dangi sensak tia arutsü; aser ne tanüngba nok o nü amba nisung ka ama arutsü.

¹²Mashikoshi tebang tener jajabaji, tatangokdak maka, temenen nisung lir.

¹³Pai pei tenük agi atsüker, pei tetsüng agi ajemshir, pai pei temeyong agi temaitsü sayur.

¹⁴Mashikoshi pa mulungjang nung lia, pai temenen tasa asar. Maneni rarabangsenba proker.

¹⁵Anungji pa dangi lendong aoksa arutsü, aoksa pa raksatsü, aser aji kechaia junga kümdaktsütsü makoktsü.

¹⁶KIBUBAi sempaba mapa trok lir; hau, pa tsüngdang tesempatsü tenet lir.

¹⁷Asüküm tenük, tiyazü temeli, aser tai maketba zü tokshiba teka,

¹⁸temenen tasa asaba temulungjang, tai inyaktsü kara-a asemba tetsüng;

¹⁹tiyazü jembiba kuli, aser adianu rongnung rara bangsen prokba nisung.

²⁰Kü chir, nebui melaba benshiang, aser netsüi sayuba senzüka teyutsü.

²¹Itemji ne mulung nung maneni alenlokang. Itemji ne tekong nung mesülokang.

²²Nai jajadang, yagi na anitsü, mejangdang yagi na anüktsü; aser na sakdang, yagi ne den jembitsü.

²³Kechiyong ozüngji milen, aser tesayubaji tesangwa lir. Metongshitsü arütsübaji taküm lenmang lir.

²⁴Temenen tetsür nungi aser bendanger temeli tanep nungi na sottsü.

²⁵La tobur ajungba ne mulung nung tazütapung; mesüra la nüktzüi na temesüzükdaktsü.

²⁶Kechiyong nüktapangtatsür kaji amtsük telong ka agi aatsü akok, aser tangar kibutsü jagi nisung taküm kaji raksatsür.

²⁷Nisung kati pei teku nung mi bener, pa süoshi merongdoktsüi lidi ma?

²⁸Mesüra kati mijang tait manung jaja nung, pa tetsüng merongi lidi ma?

²⁹Yamaji pei kiyonger kibutsü den medembaji alitsü. Shibaisa la dak kongshidir,pa memerenshi-i malitsü.

³⁰Auür kati aya sünemtsü auya-a lira, nisungtemi pa mesempar.

³¹Saka pa putetrabang, pai tenet sü meyiptsütsü. Pa ki oset ajak pai agütsütsüla.

³²Shibai tetsür ka den nüktapangtar, pa shisa maka. Shibai aji benshidir, pai pei sasa raksar.

³³Zübu aser telatetshi pai angutsü; aser pa maksü maidoki alitsü.

³⁴Kechiyong tenük meremba agi nisung ka rasarabongdaktsür; aser mangyangba anogo nung pai mapayutsü.

³⁵Temenok kecha pai züngshia malitsü; mesüra sempet aika nai agüjaka, pa temulung masütsü.