Read njo APIJEMTSÜ SHIN 8 Bible Online

APIJEMTSÜ SHIN 8 - njo bible

APIJEMTSÜ SHIN 8

¹ Tashitemeteti mayimtener ama? Tangatetbai la ola madoker ama?

²Lenmang lenti anasa, lenjem lenkong nungi lai noktaker.

³Süngkhüm tezülen yimti jakdang, kikümbang leni aidak, lai ola adoka ayimtener;

⁴“Oh, nisungtem, ni nenok dang ajar; aser kü olaji nisung chirtem dangi lir.

⁵Oh nenok tongmelanger, shisatsü angazükang; aser nenok tamachitem, temulung tenang.

⁶Angang, kechiyong ni tamaren indang jembitsü; aser kü tebangmechi nungi shitakbatem adoktsü.

⁷Kechiyong kü bangi ochiba jembitsü; temenen kü bang dang tesempatsü lir.

⁸Kü bang atema ajak temeshi lir; Item nungji tekirak mesüra mashikoshi kecha mali.

⁹Tangateter dang parnokji tongmelang, shisatsü angur dang parnokji shitak lir.

¹⁰Taribi melen, kü tesayuba; hon tajungtiba dang nungi shisatsü agizükang.

¹¹Kechiyong sentilung dang nungi tashitemetet tajungba, aser taginütsü oset ajak den aji medemdangtsü makok.”

¹²“Ni, tashitemeteti shitak metetba kü talidak kümogo aser shisatsü aser teshisadangba ni bushiteter.

¹³KIBUBA tsübubai temenen sempatsü; asüküm, jaksajaklem aser temenen lenmang aser mashikoshi tebang ni sempar.

¹⁴Kipok sayuba aser tetangshi tashitemetet kü meyong; kü dak tangatetba lir; kü dak tashi lir.

¹⁵Ni ajanga chubatemi chubar, aser yimsüsürtemi ochishia yimsü asür.

¹⁶Ni ajanga chubatemi yimsü asür, aser tongtipurtemi yimsü asür.

¹⁷Kü dang meimertem dang ni meimer; aser shirnoki ni nendaka bushir parnoki ni angur.

¹⁸Rongsen aser khonang kü den lir; hau, sangtema aliba rongsen aser azükaru dena.

¹⁹Kü süngjang hon dang nungi, hau, hon dang nungia tajungba. Aser kü züinba taribi takutet dang nungi taoba.

²⁰Temeshiba lenmang nung, ochishiba lenmang nung ni jajar.

²¹Aji agi kü dang meimer nem rongsen lemzüktsür. Aser parnok rongseni ki süngtsür.”

²² “KIBUBAi akhi mapatem dang tama, pa mapa tetenzük nung ni poktetdaktsü.

²³Alima malidang, tetenzük nungi, putusa putu ogo,ni poktetdakja liasü.

²⁴Tarokdak malidang, ni liasü. Idangji tzü aitba tzüpokdak mali asü.

²⁵Tenemtem makümdang, ungsem makümdang ni liasü.

²⁶Idangji pai ano alima mesüra moapu, mesüra alima nung mezüngbuba auyi meyanglui liasü.

²⁷Pai anüngtem renemdang ni idakji liasü; tzüyim tema nung pai lunglunga asüdang,

²⁸temalen anüngtem akanga pai yangludang, tzüyim tzüpokdak tashi ita akümdang,

²⁹tzüyimi pa ozüng meraksatsüla ta, pai tzüyim dang ozüng agütsüdang, alima tamentakdak pai shimtetdang,

³⁰tesangra teyanglur ka ama, pa tsüngdang anogo shia pelaseta,

³¹kenüamati pa pelatsüji ni liasü, aser kü tepelatsüji nisung chirtem den liasü.

³²Tang anungji, kü chirtem, kü dang angang. Kechiyong kü lenmang nung jajartemji tepelatsü.

³³Tesayuba angang aser shisa ka-ang, aser aji sentoka tetoktsü.

³⁴Anogo shia kü süngkhüm nung mita, kü kishi züngdang ata, kü dang angaba nisungji tepelatsü.

³⁵Kechiyong shibaisa ni bushiteter pai taküm angur. Aser KIBUBA yimlibilem angutsü.

³⁶Saka shibai ni anema tai menar, pa pei sasa yirur. Ni sempar ajaki tasüba meimer.”