Read njo APIJEMTSÜ SHIN 9 Bible Online

APIJEMTSÜ SHIN 9 - njo bible

APIJEMTSÜ SHIN 9

¹Shisatsüi la ki yangluogo. Lai lung tongshi tenet angentetogo.

²Lai lar shirurutem tepsetogo. Lai lar yi meyoktepogo. Lai lar langbang renemogo.

³Lai yimti lenkongtem nungji, ayimtentsü par aiürtem yokogo.

⁴“Shibasa tongmelang lir, pai ileni meyipdakjang.” Shisatsüi anünga alir dangji lai ashir,

⁵“Arung, kü meyong amtsük chiang, aser ni meyoktepba yi jemang.

⁶Tongmelangji tokjang aser taküm liang, aser tangatetba lenmang nungji jaja-ang.”

⁷Shibai sensamasatsür metongshir, pai pei sasa asoshi telatetshi angur; aser shibai temenen nisung arütsür pai pei sasa tenüng menük angur.

⁸Sensamasatsür ka tarütsü, ashiko pai na sempatsü. Tangateter ka arüjang, aser pai na meimtsü.

⁹Tangateter ka nem tesayuba agüjang, aser pa ano tali shisa takaba alitsü; ochishir nisung ka dang sayuang, aser pa tangazükba nung renloktsü.

¹⁰ KIBUBA tsübubaji shisatsü tetenzükba aser Temeshisang metetbaji tangatetba lir.

¹¹Kechiyong ni ajanga ne arishi anogotem arentsü, aser ne arishi küm renloktsü.

¹²Na shisa kaa lira, shisatsüi na moatsütsü; Aser nai sensamasarabang, nai pei sasa abentsü.

¹³Tamashi tetsürji tejepjep, la tongmelangra aser kecha maaker.

¹⁴Lai pei ki kishi züng nung, yimti lenkong menden manung mener,

¹⁵pei lenmangi aor, süisüponger dang ajar.

¹⁶“Shibasa tongmelang lir, pai ileni meyipdakjang.” Aser tangatetba nung anünga aliba dang lai ashir,

¹⁷“Auyaba tzüji tanang, aser miima achiba amtsükji jangratemtsü lir.”

¹⁸Saka tasürtemji idakji lir ta, oda Sheol tarokdakji lar aenertem lir ta, pai memeteter.