Read njo SAYUTSÜNGIR 1 Bible Online

SAYUTSÜNGIR 1 - njo bible

SAYUTSÜNGIR 1

¹Yirusalem nung chuba, Dawid chir, Sayutsüngir o.

²Amajok rongnung amajok, Sayutsüngir jagi ashir, amajok rongnung amajok! Ajak amajok.

³Nisungi anüng kübok inyakba, pa belemba tajangzük kechi?

⁴Putu ka aor aser tangar putu ka arur; saka alimaji teti alir.

⁵Anüji adoker aser anüji air, aser pei tadokleni ilunger.

⁶Mopungi anüdoklentipi aor, aser anüolentipi meyiper; pai pei lenmang nung maneni lunga aor aser ano meyipshia nair.

⁷Ayong ajak tzüyimi ayimer, saka tzüyimji masünger; kechi nungi ayongji ayimer aji agisa tanaben aor.

⁸Kechisarena tebilemtsü agi sünga lir; nisungi ya mejembitet; tanguba agi tenük masünger, mesüra tangashiba agi tenarong masünger.

⁹Oda kechi liasü ajisa alitsü; kechi inyakogo ajisa inyaktsü; aser anüng kübok kecha tasen maka.

¹⁰“Ajiang, ibai tasen lir” ta nisungi ashiba oset ka lir ma? Asen dang tama pututem tendak ibai liasü.

¹¹Akhidang atalokba kecha mebilemtettsü, mesüra tesülen arur rongnung tarutsü aliba atalokba kecha mebilemtettsü.

¹²Ni, Sayutsüngirji, Yirusalem nung Israel madak chuba liasü.

¹³Aser anüng kübok inyakba ajak indang, kü temetetba shisatsü agi bushitsü aser bushitettsü asoshi ni temulung agütsü; ibai oda Tsüngremi nisung chirtem nem mazüngi alitsü asoshi agütsüba mapa tasak ka.

¹⁴Anüng kübok inyakba mapa ajak ni nguogo; aser ajiang, ajak amajok, aser mopung anema merangba dang.

¹⁵Koba tekirak lir metongtsü makok, aser kechi matoksai lir züngdangtsü makok.

¹⁶ Ni kü mulung dang yamai ashi, “Ajiang, kü dang tama Yirusalem alir ajak dang alaka ni shisatsü tulu nguogo; hau, kü koloki tashitemetet aser tangazükba tulu ajangshia aruogo.”

¹⁷Aser ni tashitemetet aser yiaba aser tamachi metettsü ni temulung agütsü, aser ni ajiteter oda ibaia amajok aser mopung anema merangba dang.

¹⁸Kechiyong tashitemetet tali lira temulung shirangba tali; aser temetetba renlokra tejashi züiner.