Read njo SAYUTSÜNGIR 10 Bible Online

SAYUTSÜNGIR 10 - njo bible

SAYUTSÜNGIR 10

¹Manga tasü agi teronem menem yanglusang mozü teshinem menemdaktsür; yamaji shisa makaba tila ka agi shisatsü aser nüngsang ozüka endoker.

²Shisakar temulungjangji pei tajichilen aor, saka shisa makar temulungjangji tabelen aor.

³Hau, ano kodang shisa makar lenmang nung jajar, pai mangateter; aser ajuruba shia dang, “Ni suwar” ta ashir.

⁴Na anema yimsüsüri ain adokra, ne jenjang tainshi, kechiaser ajem ajema aliba jagi tai tulutemji pungpadaktsür.

⁵Anüng kübok yimsüsür aibelen nungi adok ama tamajung ka ni angu.

⁶Shisa makar aisünung sentsüwangshi nung amener saka takar tajemzükdak amener.

⁷Ni alartem kor nung sanger angu, aser chubatem alar ama ali nung jaja-a angu.

⁸Shibai ongken atur pa idakji asongtsü, aser shibaisa jara raksar peri pa dak mechitsü.

⁹Shibai lung angener, aji agi pa yirutsü, aser shibai süng asur, idakji lendong lir.

¹⁰Merangji sünemadokrabang, aser pai nokji mairabang, pai tashi tali agütsütsüla; saka anishitsü asoshi shisatsü tenüngdaktsü.

¹¹Pa mepuadang per jagi mechirabang, idangji tepuasang dak tajangzük maka.

¹²Shisa takari jembiba oji taochi agi sünga lir, saka shisa makar tebangmechi agi pei sasa meyoktsü.

¹³Pa tebang nungi kazükdang pa o tamashi lir, aser pa o jembiba tatem ashikülak yiaba lir.

¹⁴Shisa makari o temloka jembir; saka nisungi kechi asütsüar memetet, aser pa sülen kechi ataloktsüar shibai pa dang shitet?

¹⁵Shisa makari inyakba jagi pa anidaktsür, kechiaser pai yimti jagi aotsü lenmang memetet.

¹⁶Ne chuba tanur süra aser ne yimsüsürtemi anepdang tashi benjong chiyungra, Oh alima, na asoshi aiatai!

¹⁷Kodang ne chuba tamarener kin südir, aser kodang ne yimsüsürtemi tashi angutsü asoshi, saka temeseptsü asoshi masü, tim mapang nung dang chiyungdir, Oh alima na asoshi tepelatsü!

¹⁸Azümesen agi kilemji jirepdaktsür; aser meinyakba agi tzünglu sendaktsür.

¹⁹Menüshishi asoshi benjongji yanglur; aser yi agi takümji peladaktsür; aser ajak asoshi sen lalur.

²⁰Ne mulung nung danga chubaji atakatem tesü; aser na mejangdak nungi atakatem tesü; kechiaser anüng ozüi ne olaji belentsü, mesüra tashikang atenertemi aji ashitsü.