Read njo SAYUTSÜNGIR 11 Bible Online

SAYUTSÜNGIR 11 - njo bible

SAYUTSÜNGIR 11

¹Ne chiyungtsüji tzüma nung prokang; kechiaser nai anogo aika lir aji angutsü.

²Tenet sü mesüra oda ti sü tashia shilem lemsa-ang, kechiaser alima nung kechi tamajung ataloktsü nai memetet.

³Mepetji tzü agi sünga lira parnoki alima nung tzünglu aludaktsür, aser süngdong ka anüdoklentip mesüra anüolentip leni laora, süngdongji kolen laodir idakji alitsü.

⁴Shibai tsüngsang ajung atadir pai meproktsü; aser shibai mepetji repranga lidir pai alu marutsü.

⁵Nai mopung lenmang memetet ama, mesüra tetsür nu menden nung tanur teretji koda ainer memetet ama, yamaji Tsüngrem shibai ajak yanglur pa mapaji nai memetet.

⁶Anepdang ne metsüji prokang, aser nikongdang neka sota teyu; kechiaser koba metsü ajungtsüar, ya asü aji asü, mesüra anaprongji kasa ajungtsüar nai memetet.

⁷Atangji tesangwaji tanang, aser tenük agi anü reprangtsüji jangratemtsü lir.

⁸Hau, nisung ka alima nung küm aika arishia lira, item ajak nungji pa peladakjang; saka pa nem tammang anogotem bilemtetdakjang, kechiaser itemjia aika asütsü. Tarutsü ajak amajok lir.

⁹O asangur, ne asangwa asüdang pela-ang; ne asangwa mapang nung ne mulungjangi na ajongshidakjang, aser ne mulungjangi anilen, aser ne tenük agi ajunglen oang, saka ya metetang, oda item ajak asoshi Tsüngremi na o bendangtsü.

¹⁰Anungji ne mulungjang nungi shisabulu agienang; kechiaser ne lanuwa aser asangwa takümji amajok lir.