Read njo SAYUTSÜNGIR 12 Bible Online

SAYUTSÜNGIR 12 - njo bible

SAYUTSÜNGIR 12

¹Ne lanuwa anogo nung ne Teyanglur bilemtetang, mesüra anogo tamajungtem arua, aser kümji süitema arudang nai ashitsü, “Ni item dak jangratemtsü mangur;”

²mesüra anüji, aser tesangwaji, itaji, aser petinutemji mangadoktsü, aser tzünglu arur mepet nungtentsü;

³iba anogo nung ki anükertem atententsü, tashi tait nisungtem mokremtsü, aser tsüksenertem anentsü, kechiyong parnok ishika dang aküm, aser kichiba nungi repranger tenük nüma-a akümtsü,

⁴aser yimdong nung kishi shibangtsü. Kodang tsüksenba ola angashia kümdir, aser kati ozü ola angashia aoksadir, aser kentener jalatem ajema kümdir;

⁵hau, kechi temalen ali parnoki tsübur, aser lendang taoksatsü alitsü; aser almond süngdong teben apungtsü, aser jangkok pei sasa atsür aor, aser aginüa jangraba malitsü. Kechiaser nisung teti alidaki aor, aser mangyimer yimdong nung senzür.

⁶Taribi lisü metokdang dang, hon susa mejakrep dang mesüra tzübu nung tzüshi mejakrep dang, mesüra talungtsü tzübu nung meraksadang;

⁷aser aji tamasa aliba ama auyiji ali-i meyiper, aser tanelajibo tagütsüsang Tsüngrem dangisa shilangtsü.

⁸Amajok rongnung amajok, Sayutsüngir jagi ashir, ajak amajok.

⁹Sayutsüngirji shisa ka-a alibajidang masü, pai nisungtem dang temetetba sayu, hau, pai seret odanga, tendanga, aser bushia, apijemtsü shin aika tatongi benden.

¹⁰Sayutsüngir jagi tanganütsü otem angutsü bushi, aser indang indanga ochi o zülu.

¹¹Shisa akar oji nület ama, aser sannüker kati bendena agütsüba tashir oji kojal akang akanga angenlok ama.

¹²Kü chir, idakji jia ya ashir, kümdangang; kaket aika yanglu nung tatembang maka; aser angazüktsü kanga bushibaji shi belemba dang.

¹³Tatembangji ya: ajak angadangogo; Tsüngrem tsübuang, aser pa ozüng benshiang, kechiaser nisung teinyaktsü mapa ajak agi ojang.

¹⁴Kechiaser tajung süaka, tamajung süaka, miima aliba ajak den Tsüngremi mapa ajak o bendangtsü.