Read njo SAYUTSÜNGIR 2 Bible Online

SAYUTSÜNGIR 2 - njo bible

SAYUTSÜNGIR 2

¹Ni kü mulung nung ashi, “Arungjong, ni pa pelaba tendangdi; na sünütsüsa pela-ang.” Saka ajiang, ibaia amajok liasü.

²Ni ashi, menüshishibaji tamachi, aser pelashishibaji kechi tagidak ali?

³Parnok arishi tatsü mapang nung anüng kübok nisung chirtem inyaktsü asoshi kechi tajung lir, aji ni ngutettsü asoshi, tashitemetet agi kü kolok anishia, yi agi kü mang koda peladaktsütet aser tamachi mapa nung koda teka yitet, aji kü kolok agi bushi.

⁴ Ni mapa tulu inyak; ni asoshi kitem yanglu, aser tsükmenatzü atem.

⁵Ni asoshi naro tsüki aser kazüdak ni yanglu, aser ni item nungji süngdong tapu ajak atem.

⁶Süngdongtem meia alidak min nungji tzü agütsütsü asoshi, ni tzütu atu.

⁷ Ni alar aser alatsür aliten, aser kü kidang asoba alartem liasü; aser Yirusalem nung kü dang tama alir ajak dak alema, ni nashi aser san telok kaa liasü.

⁸ Yimlitem aser chubatem rongsen aser hon aser taribi ni yaten, ni tebur aser tetsür kentener ayu, aser nisung chirtem pelatsü züngatsür aika ayu.

⁹ Anungji ni tulu aküm; aser Yirusalem nung kü dang tama alir ajak dang alema ao; aser kü temetetba shisatsü kü den ano liasü.

¹⁰Aser kechisa kü tenük agi jangra item nungjagi ni matsüngzük; kü tepelatsü kecha nungia atsüngzüka metoktsü, kechiaser kü mapa ajak nung kü mulung pela-a liasü; aser ni inyakba ajak nungi kü tajangzük ya liasü.

¹¹Idangji kü teka agi inyakba mapa ajak, aser ni aji inyaktsü bilemba indang reprang aser ajiang, ajak amajok aser mopung anema merangba dang liasü aser anüng kübok tajangzük kecha mali asü.

¹²Anungji ni kü sasa shisatsü akaba, yiaba, aser tamachi bilemdangtsü meyip; kechiaser chuba sülen aruba nisung jagi kechi inyaktet? Pai tamalen kechi inyakogo aji dang inyaktet.

¹³Idangji ni ya angu, oda tesangwai ammang dak kodaka agi tajungba, patakaji tashitemetet agi tamachi dak alia lir.

¹⁴Shisa akar tenükji pa tekolak nung aten, saka shisa makartemji ammang nung jajar; aji saka ni ya reprangtet oda parnok ajak dak tia kasa arur.

¹⁵Idangji ni kü mulung nung ashi, “Shisa makar dak atalokba ama kü daka ataloktsü; sürabang kechiba ni tali shisa akatsü?” Idangji kü mulung nung ibaia amajok ta ni ashi.

¹⁶Kechiaser shisa takara shisa makar amasa tetibo mebilemtettsü, kechiyong tarutsü anogo nungbo ajak amadoker alitsü.

¹⁷Anungji ni takümji sempa, kechiaser anüng kübok inyaktetba mapatem ni asoshi tejashitsü liasü; kechiyong ajak amajok aser mopung sülen aritepba ka dang lir.

¹⁸Kü sülen arutsüba nisung nem dang ni toktsütsü ta ngua anüng kübok ni belema inyakba kü mapa ajak ni sempa.

¹⁹Aser paji shisa taka asütsü asü shisa maka asütsüar shibai metet? Aji saka kü mapa kechi nung ni belem aser anüng kübok tashitemetet sayu, item mapa ajak madak pa kibur asütsü. Ibaia amajok lir.

²⁰Anungji anüng kübok inyakba kü mapa ajak toktsür ni kü mulung shia ali.

²¹Kechiaser khen khenbo shibai shisa ka-a, aser temetetba agi aser tesangra agi inyak, aji ajak shibai idakji mebelem pa nem pa sünütsüsa toktsütsüla. Ibaia amajok aser temenen dang.

²²Nisungi tebelem, shisa bulu koba bener pai anüng kübok inyaker, ya ajak asoshi pa kechi aka?

²³ Kechiaser pa arishi tepiyong tejashitsü dang; aonung pa anisüngzük mangur. Ibaia amajok.

²⁴ Nisung asoshi pei züsen nung tepela ngua chia ajemba dak alema tajungba kecha maka. Ya Tsüngrem ket nungiang ta, ni angu.

²⁵Kechiyong pa medeni shibai chitet aser jangratema litet?

²⁶Kechiaser shibai pa peladaktsür, pa nem Tsüngremi shisatsü tashitemetet aser tepela agütsür, saka temenenpur nembo pai bendentsü aser rizüngtsü mapa agütsür, oda Tsüngrem mulung achir nem agütsütsü asoshi dang. Ibaia amajok aser mopung sülen toktepba ka dang.